काठमाडौं । काठमाडौँ महानगरपालिकाका मेयर बालेन्द्र शाह (बालेन) ले हिजो (शनिबार) मध्यराति लेखेर केहिछिनमा मेटेको एक स्टाटसको स्क्रिनसट अहिले सामाजिक सञ्जालमा ‘भाइरल’ बनिरहेको छ ।

अमेरिका, भारत र चीनसहित नेपालका राजनीतिक दलहरूलाई गाली गर्दै अंग्रेजीमा लेखेको त्यस स्टाटसमा बालेनले अश्लील शब्द प्रयोग गरेको भनी चर्काे आलोचना भइरहेको छ । शनिबार राति ११ः५६ बजे लेखेको त्यो स्टाटस उनले केहीबेरपछि नै हटाएका थिए । तर सामाजिक सञ्जाल प्रयोगकर्ताले स्क्रिनसट राखेर व्यापक टिप्पणी र आलोचना गरिरहेका छन् ।

उनले स्टाटसमा अमेरिका, भारत र चीन तथा नेकपा एमाले, नेपाली कांग्रेस, राष्ट्रिय स्वतन्त्र पार्टी (रास्वपा), राष्ट्रिय प्रजातन्त्र पार्टी (राप्रपा) र माओवादीलाई गाली गरेका छन् । उनले ‘सबै मिले पनि केही गर्न सक्दैनन्’ भनेका छन् ।