काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेलाई भेट्न पुगेकी उनकी पत्नी निकिता पौडेल लामिछानेलाई नभेटी सिंहदरबारबाट फर्किएकी छन् । जेनजी आन्दोलनसम्बन्धी घटनाको छानबिन गरिरहेको जाँचबुझ आयोगले बुधबार दिउँसो लामिछानेलाई बयानका लागि सिंहदरबार बोलाएको थियो । त्यही समयमा निकिता पनि त्यहाँ पुगेकी थिइन्, तर केही समयमै फर्किइन् ।

तर, चर्चामा आएको जस्तो उनी रविलाई भेट्न नभई आयोगलाई आवश्यक कागजातका सक्कल प्रतिलिपि बुझाउन पुगेको निकिताले स्पष्ट पारेकी छन् । आयोग परिसरबाट बाहिरिएपछि उनले भनिन्, ‘उहाँ (रवि) भित्र आयोगका पदाधिकारीहरूसँग कुरा गर्दै हुनुहुन्थ्यो । म बाहिरबाटै फर्किएँ, भेट हुने समय मिलेन ।’

आयोगले भदौ २४ गते लामिछाने जेलबाट बाहिरिएको घटनाको गहिरो अनुसन्धान गरिरहेको छ । यसअघि आइतबार नख्खु कारागारमै गएर आयोगका अधिकारीहरूले लामिछानेसँग भेट गरेका थिए । भेट सामान्य रहेको आयोगका प्रवक्ता तथा पूर्व एआईजी विज्ञानराज शर्माले बताएका थिए ।

आयोगका अनुसार आइतबारको कुराकानीलाई औपचारिक बयानको रूपमा अभिलेख गर्न बुधबार लामिछानेलाई सिंहदरबार ल्याइएको थियो । लामिछानेले सो क्रममा आफू कारागारबाट भागेको नभई प्रहरी र गृह प्रशासनको निर्णय अनुसार प्रक्रिया पूरा गरेर बाहिर आएको बताए । पछि सो कागजी प्रक्रिया कानुनी रूपमा त्रुटिपूर्ण ठहरेपछि उनी आफैं कारागार फिर्ता भएको उनको भनाइ छ । लामिछानेले उक्त प्रसंगसँग सम्बन्धित केही मूल कागजात घरमै छोडेका थिए । आयोगले ती कागजातका सक्कल प्रतिलिपि मागेपछि निकिता ती बुझाउन पुगेकी थिइन् । उनले भनिन्, ‘आयोगले ओरिजिनल डकुमेन्ट माग्नु भएको थियो, म तिनै दिएर फर्किएँ ।’