चितवन । राष्ट्रिय स्वतन्त्र पार्टी (रास्वपा) केन्द्रीय समितिको विस्तारित बैठक चितवनको सौराहामा सुरु भएको छ । दुई दिनसम्म चल्ने बैठकको केही बेरअघि उद्घाटन भएको छ । बैठकमा कार्यवाहक सभापति डीपी अर्यालले राजनीतिक प्रतिवेदन, उपसभापति स्वर्णिम वाग्लेले आगामी निर्वाचनका लागि वाचा पत्रको प्रस्तावना प्रस्तुत गर्ने र महामन्त्री कविन्द्र बुर्लाकोटीले साङ्गठनिक संरचनाको प्रस्तावना पेस गर्ने प्रवक्ता मनिष झाले बताए ।

बैठकमा केन्द्रीय समितिसहित प्रदेश, जिल्ला तथा क्षेत्रका पदाधिकारीहरू प्रतिनिधिकारुपमा सहभागी छन् । प्रस्तावमाथि समूह विभाजन गरेर छलफल हुने उनले बताए । बैठकमा सभापति रवि लामिछानेमाथि भएको राजनीतिक प्रतिशोध विरुद्ध जनताको हस्ताक्षरको प्रतिवेदन प्रस्तुत दीपक बोहराले प्रस्तुत गर्ने तय भएको छ । यस्तै बैठकले आगामी महाधिवेशनदेखि नयाँ वैकल्पिक शक्तिहरूसँग एकता वा सहकार्यबारे भइरहेको छलफलबारे पनि निर्णय गर्नेछ ।