चितवन । राष्ट्रिय स्वतन्त्र पार्टी (रास्वपा) ले वर्तमान राजनीतिक अनिश्चितताको एक मात्र निकास आगामी निर्वाचन नै भएको ठहर गरेको छ । पार्टीका कार्यवाहक सभापति डोलप्रसाद (डीपी) अर्यालले शुक्रबार सौराहामा शुरु भएको विस्तारित बैठकमा राजनीतिक प्रतिवेदन प्रस्तुत गर्दै भने, ‘जेनजी आन्दोलनपछि संविधान डिरेल भएको छ, यसलाई पुनः ट्रयाकमा ल्याउने औजार निर्वाचन नै हो ।’

अर्यालले संसद पुनर्स्थापनाबाट देशले कुनै स्थायी समाधान नपाउने दाबी गर्दै भने, ‘संसद फर्के पनि पुगिन्छ त्यही ठाउँमा—जहाँ सरकार त बन्ला, तर जेनजी आन्दोलनको म्यान्डेट र जनभावनालाई सम्बोधन गर्न सक्दैन ।’ उनले प्रधानमन्त्री सुशीला कार्कीको नियुक्ति र प्रतिनिधिसभा विघटनविरुद्ध सर्वोच्च अदालतमा परेका रिटबारे टिप्पणी गर्दै न्यायालयले आफ्नो ‘न्यायिक भूमिका’ खेल्ने विश्वास व्यक्त गरे । तर, संसद पुनर्स्थापना भयो भने त्यसले देशलाई पुनः अराजक मोडमा धकेल्ने सम्भावना औंल्याए ।

रास्वपाको प्रतिवेदनमा भनिएको छ, ‘दलीय व्यवस्थामा विशेष परिस्थितिबाट गैरदलीय सरकार बनेको हो । अब यो सरकारको पहिलो दायित्व नै निर्वाचन गराउने हो ।’ अर्यालका अनुसार निर्वाचनले मात्र लोकतान्त्रिक प्रतिस्पर्धा पुनः स्थापित गर्छ र संविधान कार्यान्वयनको ‘ट्रयाक’ मा फर्किन्छ । पार्टीले सबै दलहरूलाई आगामी फागुन २१ को निर्वाचनलाई ‘अर्जुन दृष्टि’ का रूपमा लिन आह्वान गरेको छ । ‘देशलाई पुनः लोकतान्त्रिक बाटोमा फर्काउने शक्ति निर्वाचनमा केन्द्रित हुनुपर्छ’, प्रतिवेदनमा भनिएको छ ।

कार्यवाहक सभापति अर्यालले प्रधानमन्त्री र केही दलबीच संवादको कमीले राजनीतिक दूरी बढाउने चिन्ता व्यक्त गरे । ‘सरकार सबै दल र जनताको अभिभावक हो, त्यसैले कुनै आग्रह वा पूर्वाग्रह राख्नु हुँदैन’, उनले भने । रास्वपाले सम्पत्ति विवरण बुझाउन असफल ‘नागरिक सरकार’ लाई अनन्तकालीन समर्थन गर्न नसक्ने पनि स्पष्ट पारेको छ । ‘प्रतिशोधको राजनीतिविरुद्ध सरकार कसरी प्रस्तुत हुन्छ, सुशासन र दण्डहीनताको अन्त्यमा कति इमान्दार देखिन्छ, र निर्वाचनका तयारीमा कस्तो सक्रियता देखाउँछ—त्यसले हाम्रो शुभेच्छा निरन्तर रहन्छ कि क्रमभंग हुन्छ, निर्धारण गर्नेछ’, प्रतिवेदनमा भनिएको छ ।