चितवन । राष्ट्रिय स्वतन्त्र पार्टी (रास्वपा) ले पार्टीभित्र हस्तक्षेप गर्ने वा ‘कब्जा’ गर्ने प्रयासहरूलाई खुला रूपमा प्रतिवाद गर्ने घोषणा गरेको छ । चितवनको सौराहामा शुक्रबार सुरु भएको विस्तारित बैठकमा कार्यवाहक सभापति डीपी अर्यालले प्रस्तुत गरेको राजनीतिक प्रतिवेदनमार्फत पार्टीले यस्तो चेतावनी दिएको हो ।

अर्यालले प्रतिवेदनमा भनेका छन्, ‘पार्टी स्थापना गर्दा अहिले नाम आएका सबैसँग सँगै जाऊँ भन्ने कुरा गर्दाको साक्षी म स्वयं हुँ । तर, त्यसबेला उहाँहरूले पत्याउनु भएन । अहिले पनि हामी उहाँहरूलाई हार्दिक स्वागत गर्न चाहन्छौं । तर, पार्टीको इतिहास र पहिचान बुझ्न जरुरी छ । ‘कब्जा’ गर्ने नियत चाहिँ हामी खुला रूपमा प्रतिवाद गर्छौं ।’

यो भनाइ कुलमान घिसिङतर्फ लक्षित देखिएको बताइएको छ । ऊर्जा क्षेत्रका चर्चित व्यक्तित्व घिसिङले नयाँ दल गठनको तयारीसँगै रास्वपामा प्रवेशको सम्भावनामा चर्चा चलिरहेको थियो । उनले रास्वपाको कार्यकारी सभापति बन्ने शर्त राखेका थिए, तर त्यो अस्वीकार भएपछि दुवै पक्षबीचको सहकार्य सम्भावना लगभग टुटेको छ । प्रतिवेदनमा रास्वपाले पुराना तीन दलको वर्चस्व अन्त्य गर्न वैकल्पिक शक्तिहरूबीच सहकार्य आवश्यक रहेको उल्लेख गरेको छ । पार्टीले समान विचार र कार्यशैली भएका समूहहरूसँग हातेमालो गर्नुपर्ने र राष्ट्रिय हितका एजेण्डामा आधारित सहकार्यका लागि खुला रहने नीति लिएको छ ।

अर्यालले प्रतिवेदनमा भनेका छन्, ‘व्यक्तिगत अहं र सानातिना मतभेदभन्दा माथि उठेर एकता, मोर्चाबन्दी वा सहकार्यका लागि तत्पर हुनुपर्छ । सम्भव हुनेसँग एकता गर्ने, नहुनेसँग मोर्चाबन्दी र त्यो पनि नहुनेसँग सीमित मुद्दामा तत्कालीन सहकार्य गर्ने नीति अवलम्बन गर्नुपर्छ।’ रास्वपाको यो अभिव्यक्ति दलभित्र वैकल्पिक नेतृत्व र बाह्य सहकार्यका विषयमा चलिरहेको नयाँ समीकरणबीच आएको हो । जसले नेपालको वैकल्पिक राजनीतिक शक्तिहरूबीचको आगामी गठजोडमा नयाँ मोड ल्याउन सक्ने देखिन्छ ।