काठमाडौँ । उद्योग, वाणिज्य तथा आपूर्तिमन्त्री अनिलकुमार सिन्हाले उद्योग-व्यवसायमा देखिएका कानुनी अवरोधहरू हटाउन सरकार प्राथमिकताका साथ अघि बढ्ने बताएका छन्।

शनिबार काठमाडौंमा आयोजित राष्ट्रिय आर्थिक बहस कार्यक्रममा बोल्दै उनले अड्किएका उद्योगका फाइल र प्रस्तावहरू तत्काल फस्र्यौट गर्ने तयारी भइरहेको बताए।

‘धेरै कुरा बुझ्ने मौका पाइसकिएको छ, अब ती कुराहरूलाई प्राथमिकताका आधारमा अघि बढाउनुपर्छ,’ मन्त्री सिन्हाले भने, ‘कुन ठाउँमा कानुनी अवरोध छन्, कुन कारणले अर्थतन्त्र चलायमान हुन सकेको छैन भन्ने पहिचान गरेर अघि बढ्ने मेरो सोच छ।’

उनले अन्तर–मन्त्रालय सहजीकरण आवश्यक रहेको उल्लेख गर्दै थपे, ‘कतिपय उद्योगका प्रस्तावहरू वर्षौंसम्म मन्त्रालयहरूमा अडिएर बसेका छन्। मैले सचिवहरूलाई ती फाइलहरू पहिलो प्राथमिकतामा राखेर फस्र्यौट गर्न निर्देशन दिएको छु। होइन भने हामी अघि बढ्न खोज्दा पछाडिबाट डोरी तानेर बाँध्ने स्थिति आउँछ। हातखुट्टा बाँधेर अर्थतन्त्र चल्दैन।’

मन्त्री सिन्हाले सरकारले अर्थतन्त्रमा नियन्त्रणकारी भूमिका खेल्न नहुने स्पष्ट पारे। उनले भने, ‘अर्थतन्त्र चलायमान बनाउन निर्णय प्रक्रियालाई अगाडि बढाउनै पर्छ। नियन्त्रित गर्ने कुरा छन् भने त्यसलाई क्रमशः घटाउँदै जानुपर्छ।’

सिन्हाले मुलुकको आर्थिक प्रणालीलाई गतिशील बनाउन सरकार आवश्यक सबै कदम चाल्न तयार रहेको पनि बताए।