काठमाडौं । संगीत सिर्जना भनेको केवल नोटहरू लेख्ने प्रक्रिया मात्र होइन । ती नोटहरू श्वास, स्वर, ताल र मानव भावनाले जिएपछि मात्र संगीत जीवित हुन्छ । यही सिर्जनात्मक सहकारितालाई प्रत्यक्ष अनुभव गराउने उद्देश्यसहित शनिबार राष्ट्रिय सभागृहमा द कम्पोजर’ स डेस्क–फर्स्ट एडिशन २०२५ सम्पन्न भयो ।

यस संस्करणमा प्रस्तुत कार्यक्रम विश्व संगीतको स्वरूपमा नेपाली लोकधुनको आत्मालाई सिनेमाटिक स्कोरको गरिमा र आयामसँग संयोजन गरिएको थियो । कार्यक्रमका संगीत संयोजन, स्वरूप र विशेष वाद्यसंयोजन नाम्लो म्यूजिक हबका संस्थापक तथा संगीतकार गंगा थापाको कलात्मक दृष्टिकोणबाट प्रेरित थिए ।

संगीतकार तथा निर्माता गंगा थापासँगै २५ संगीतज्ञ एउटै मञ्चमा लगभग तीन घण्टा लगातार लोक वाद्यवादन र आधुनिक वाद्यवादनको फ्युजनमा गुन्जियो । कार्यक्रम ‘जारी’ चलचित्रको संगीतबाट सुरु हुँदै ‘तीनपाते’, कर्णाली क्षेत्रका स्थानीय धुन बौजु, थारू समुदायको ‘सखी रि’, र समग्रमा १६ वटा सिर्जनाले सभागृहलाई संगीत यात्रामा डुबायो । मञ्चमा झण्डै २५ संगीतज्ञहरू मुरलीदेखि सारंगी, मादलदेखि बांसुरी, ड्रमसेटदेखि स्ट्रिङ सेक्शनसम्म सबैले एकै स्वरमा संगीतकारको दृष्ट्रि र भावलाई जीवन्त बनाए ।

गंगा थापासँगै एइलिन थापा : सेलो, स्वर, फोबी श्रेष्ठः भायोलिन, ईभा महर्जनः सेलो, रोश्ना शाक्यः भायोलिन, रवी श्रेष्ठः डबल बेस, स्वर्णिम महर्जनः बाँसुरी, रुपेश शाक्यः बाँसुरी, फ्लुट, परास सुवेदीः मादल, सिजन महर्जनः पर्कसन (तालवाद्य), जोसेफ श्रेष्ठः गिटार, अश्विनः सारंगी, धन बहादुर गुरुङः सनई, स्टिभ अरास्तियाः क्ल्यारिनेट र गायक-स्वर कलाकारहरू, शिङ्ग्रोन पुन, पवन गिरी, अम्शु कार्की, रेश्मा पुन, समिक्षा चौधरी, सन्तोष राना, पार्वती थापा, श्रीति प्रधान संगै बालबालिका हरुले पनि प्रस्तुति दिएका थिए । द कम्पोजर’ स डेस्क ले केवल प्रदर्शन गरेन संगीतकार र संगीतज्ञहरूबीचको संवादलाई दर्शक सामु सार्थक तरिकाले खुला गर्‍यो ।

तस्वीरहरू : नेपाल फोटो लाइब्रेरी