राजनीतिमा होमिएकी रिमालाई केकीको शुभकामना : साहस नै तिम्रो असली पहिचान
काठमाडौं । अभिनेत्री, मोडेल तथा चर्चित सञ्चारकर्मी रिमा विश्वकर्मा अन्ततः सक्रिय राजनीतिमा प्रवेश गरेपछि कला क्षेत्रमा मात्र होइन, राजनीतिक वृतमा पनि उनको नामले चर्को चर्चा ल्याएको छ ।
ऊर्जा, जलस्रोत तथा सिँचाइमन्त्री कुलमान घिसिङ नेतृत्वमा बन्न लागेको ‘उज्यालो नेपाल पार्टी’ मा जोडिएपछि रिमाले आफ्नो सार्वजनिक भूमिकामा ठूलो मोड ल्याएकी हुन् । पार्टीले उनलाई केन्द्रीय सदस्यको जिम्मेवारी दिएसँगै उनको राजनीतिक यात्रा औपचारिकरूपमा प्रारम्भ भएको हो ।
रिमाको यस निर्णयले अभिनय र पत्रकारिता दुवै क्षेत्रमा लामो समयदेखि सक्रिय उनका समर्थकहरू उत्साहित बनेका छन् । यही उत्साहलाई झनै रंगिन बनाइदिएकी छिन् उनकी निकट साथी तथा अभिनेत्री केकी अधिकारीले-सामाजिक सञ्जालमार्फतै दिइएको हृदयस्पर्शी शुभकामनासहित ।
केकीले लेखेकी छिन्, ‘मेरो प्यारो साथी रिमा विश्वकर्मालाई नयाँ राजनीतिक यात्राको हार्दिक बधाई ! सहि र न्यायको पक्षमा आवाज उठाउन कहिल्यै नडराउने तिम्रो निडरता नै तिम्रो सबैभन्दा ठूलो शक्ति हो । नयाँ भूमिकामा पनि तिमीले निष्ठा, इमानदारी र कर्तव्यनिष्ठासहित उत्कृष्टता देखाउनेछौ भन्ने विश्वास छ ।’
रियालिटी शो ‘कमेडी च्याम्पियन’ र ‘नेपाल आइडल’ का लोकप्रिय होस्टका रूपमा झनै चर्चित बनेकी रिमाको राजनीतिक प्रवेशलाई कला–सञ्चार क्षेत्रबाट समेत सकारात्मक स्वागत मिलिरहेको छ । केकीको सन्देशले पनि यही समर्थनलाई स्पष्ट संकेत गरेको छ ।
यसैबीच, ‘उज्यालो नेपाल पार्टी’ ले आगामी आम निर्वाचनमा देशभर उम्मेदवारी दिने तयारी गरिरहेको समयमै रिमाको संलग्नता आएपछि पार्टीमा नयाँ ऊर्जा थपिएको टिप्पणी राजनीतिक विश्लेषकहरूले जनाएका छन् । कलाकारिता, सञ्चारकर्म र अब राजनीति–रिमा विश्वकर्माको यो नयाँ यात्राले नेपाली सार्वजनिक क्षेत्रमा कस्तो ‘उज्यालो’ थप्ने हो, अब सबैको नजर त्यतै छ ।
