काठमाडौं । राष्ट्रिय स्वतन्त्र पार्टी (रास्वपा) की नेतृ सोबिता गौतमले सहकारी ठगी प्रकरणमा पार्टी सभापति रवि लामिछानेमाथि भइरहेको अनुसन्धानको नियतमाथि प्रश्न उठाएकी छन् ।

उनले लामिछानेलाई मात्र निशाना बनाउनुको सट्टा सहकारीको ठगी हुँदा मौन बस्ने राज्यका नियामक निकायहरूलाई कारबाहीको दायरामा ल्याउनु पर्ने बताएकी छन् । सञ्चारकर्मीसँग कुरा गर्दै गौतमले सहकारी प्रकरणलाई राजनीतिक हतियार बनाएर रवि लामिछानेलाई मात्रै थुनेपछि सबै पीडितले पैसा फिर्ता पाउँछन् भन्ने भ्रम छरिएको बताइन् ।

‘रवि लामिछानेलाई थुनिसकेपछि सबै सहकारी पीडितले पैसा पाउनु हुन्छ भने जसरी जुन खालको व्यवहार गरियो, त्यो गलत छ,’ उनले भनिन्, ‘आजको दिनसम्म पनि सहकारी पीडितहरू सडकमै हुनुहुन्छ, उहाँहरूले आफ्नो रकम फिर्ता पाउनु भएको छैन ।’

गौतमले सहकारीको सदस्य नै नभएको व्यक्तिले ऋण लिन नमिल्ने कानुनी व्यवस्थातर्फ ध्यानाकर्षण गराउँदै प्रश्न गरिन्, ‘रवि लामिछाने त सहकारीको सदस्य पनि नभएको मान्छे हो । सदस्यले मात्रै ऋण लिन पाउँछ । यदि गैर–सदस्यको नाममा ऋण निकासा भएको हो भने त्यो अवैध काम हुँदा सहकारीलाई निगरानी गर्ने निकायहरू के हेरेर बसेका थिए ?’

उनले सहकारी ठगी समस्याको समाधान व्यक्तिलाई थुनेर नभई पीडितको पैसा फिर्ता गराउनेमा केन्द्रित हुनुपर्ने बताइन् । ‘संसदीय छानबिन समितिको प्रतिवेदनले नै थुना होइन, सम्पत्ति व्यवस्थापन गर भनेको छ,’ गौतमले भनिन्, ‘तर त्यही प्रतिवेदनमा टेकेर रवि लामिछानेलाई मुद्दा चलाइन्छ । यो विरोधाभासपूर्ण छ ।’ उनले यो विषय लामिछाने राजनीतिमा आएपछि मात्र हतियारको रूपमा प्रयोग भएको दाबी गर्दै ढिलो–चाँडो अदालतबाट न्याय पाउनेमा आफू विश्वस्त रहेको बताइन् ।

यस्तै नेतृ गौतमले आफू पार्टी छाड्ने मनस्थितिमा नरहेको पनि स्पष्ट पारेकी छन् । पार्टीका अन्य नेताहरूले राजीनामा दिइरहेको सन्दर्भमा सञ्चारकर्मीले सोधेको प्रश्नमा उनले आफू पार्टी स्थापनाकालदेखि नै सभापति रवि लामिछानेसँगै रहेको र पार्टीको नीति तथा विचारमा स्पष्ट रहेको बताइन् ।

हालै रास्वपाका नेता तथा प्रमुख सचेतक सन्तोष परियारले पार्टी परित्याग गरेका थिए । यसअघि अर्की प्रभावशाली नेतृ सुमना श्रेष्ठले पनि पार्टी छाडेकी थिइन् । यही पृष्ठभूमिमा गौतमलाई पार्टी छाड्ने सम्भावनाबारे प्रश्न गरिएको थियो । उनले सभापति रवि लामिछानेले पार्टी खोल्ने प्रस्ताव राख्दादेखि नै आफू जोडिएको र पार्टी खोल्नुको उद्देश्यबारे स्पष्ट रहेको बताइन् ।

‘हाम्रो सभापति रवि लामिछाने ज्यूले प्रस्ताव गर्नु भएको बेलादेखि नै म उहाँसँग जोडिएको कारणले किन पार्टी खोलेको, कसको लागि खोलेको भन्नेमा स्पष्ट छु,’ उनले भनिन्, ‘हाम्रो पार्टीले लिएका नीतिहरूको बारेमा पनि म स्पष्ट छु । त्यसकारण मैले पार्टी छाड्नेबारे सोचेको छैन । यही हो मेरो पार्टी ।’