काठमाडौं । विश्व फ्रेन्चाइज क्रिकेटको बढ्दो क्रेजबीच नेपाल प्रिमियर लिग (एनपीएल) आज (सोमबार) देखि काठमाडौंमा भव्य रूपमा दोस्रो सिजन सुरु हुँदैछ । पहिलो सिजनमै विश्वका शीर्ष पाँच मूल्यवान लिगमध्ये स्थान बनाएर सबैलाई चकित पारेको एनपीएल यस पटक कृत्रिम प्रकाश (फ्लडलाइट), आकर्षक रङ्गशाला र विश्वस्तरीय स्टार खेलाडीहरूका कारण झनै चम्किएको छ ।

क्यानका सचिव एवं संयोजक पारस खड्काले पहिलो संस्करणको सफलता अझ उचाइमा पुर्‍याउने लक्ष्य घोषणा गर्दै सबै पक्षको सहयोगले यो सिजन ऐतिहासिक बन्ने विश्वास व्यक्त गरेका छन् । मंसिर २७ मा उपाधि भिडन्तसँगै समापन हुने लिगमा सिंगल–राउन्ड रोबिनदेखि इलिमिनेटर र क्वालिफायरसम्म गरी ३२ खेल समावेश छन् ।

आठ फ्रेन्चाइज टिमले यसपटक पनि विश्वका चर्चित क्रिकेटर भित्र्याएका छन् । फाफ डुप्लेसिस, जेसन रोय, क्रिस लिन, इमरान ताहिर, वायन पार्नेलसहित करिब ४० सुपरस्टार खेलाडीले एनपीएललाई ग्लोबल शो–स्टप बनाएका छन्। पाँच टिममा विदेशी प्रशिक्षकको उपस्थितिले प्रतिष्पर्धा झन् रोचक बनेको छ ।

च्याम्पियन जनकपुर बोल्ट्स–शिवनारायण चन्दरपल
विराटनगर किङ्स–पुबुदु दसनायके
काठमाडौँ गोर्खाज–मोन्टी देसाई
पोखरा एभेन्जर्स–राजीव कुमार
लुम्बिनी लायन्स–टिनु योहान्ना
खड्काका अनुसार विश्वस्तरीय हस्तीसितको सहकार्यले नेपाली खेलाडीहरूलाई खेलभित्र–बाहिर दुवै क्षेत्रमा महत्वपूर्ण अनुभव दिलाउनेछ ।
एनपीएल नेपाली खेल क्षेत्रकै सबैभन्दा ठूलो बजेटको लिग हो । गत वर्ष एक अर्बभन्दा बढी कारोबार गरेको लिगको ब्रान्ड भ्यालु यस पटक दुई अर्ब नाघ्ने क्यानको लक्ष्य छ ।

मार्की खेलाडी–२० लाख
अन्य घरेलु खेलाडी– २–१५ लाख
आइकोनिक खेलाडी–आकर्षक रकम
त्यसैगरी फ्रेन्चाइजहरूले प्रचारमा पनि ठूलै लगानी गरेका छन् ।
फ्लडलाइट–तयार रङ्गशाला, नेपालमा पहिलो रात्रीकालीन लिग

त्रिवि अन्तर्राष्ट्रिय क्रिकेट मैदानमा सरकारले क्यानसँग मिलेर गरेको स्तरोन्नतिपछि नेपालमा पहिलो पटक फ्लडलाइटमा क्रिकेट खेलिँदैछ । ९ खेल दिउँसो र २३ खेल रातमा हुनेछन् । नौ हजार पाँच सय टिकट बिक्री हुने बताए पनि दर्शक क्षमता १३ हजार छ, जसले वातावरण झन् विद्युतीय बनाउने अपेक्षा छ ।

आज साँझ ४ बजे हुने उद्घाटन खेल गत वर्षका च्याम्पियन जनकपुर बोल्ट्स र काठमाडौँ गोर्खाजबीच हुनेछ । गत सिजनमा जनकपुरले काठमाडौँलाई पाँच विकेटले पराजित गरेको अवस्थामा दुवै टिम आज नयाँ अध्याय लेख्न मैदान उत्रिँदैछन्ए-क पक्ष उपाधि रक्षा अभियानमा, अर्को पक्ष बदला अभियानमा ।