रुपन्देही । नेकपा (एमाले) का महासचिव शंकर पोखरेलले एमाले कहिल्यै पनि निर्वाचनबाट भाग्ने दल नभए पनि नहुने चुनावको पक्षमा प्रचार गरेर समय खर्च खेर नफाल्ने बताएका छन् । सोमबार रुपन्देहीमा आयोजित एक अन्तरक्रिया कार्यक्रममा उनले वर्तमान अन्तरिम सरकार चुनाव गराउने उद्देश्यले नबनेको आरोप लगाए ।

पोखरेलका अनुसार सरकारका गतिविधि निर्वाचनअनुकूल नभएकाले निर्वाचन आयोग सक्रिय भएर मात्र चुनाव हुन नसक्ने अवस्था बनेको छ । ‘निर्वाचन आयोगले तयारी तिव्र पारे पनि सरकार निर्वाचनतर्फ उन्मुख छैन,’ उनले भने ।

पोखरेलले केही दलका नेताहरू जनआक्रोश, विशेषगरी जेनजी आन्दोलन नबढोस् भनेर मात्रै ‘चुनाव हुन्छ’ भन्ने नारामा सीमित रहेको टिप्पणी गरेका छन् । उनले भने, ‘एमाले कसैसँग डराउँदैन । हामी जनता माझ छौं, सडकमा छौं । स्पष्ट एजेण्डासहित अघि बढेको एक मात्र पार्टी एमाले हो ।’

उनीले एमाले प्रतिस्पर्धाबाट नभाग्ने, जनतासँगै रहेर राजनीतिक एजेण्डा अघि बढाउने धारणा दोहोर्‍याउँदै अन्तरिम सरकारको निष्क्रियताका कारण चुनावको सम्भावना कमजोर रहेको निष्कर्ष प्रस्तुत गरे ।