काठमाडौं । जेनजी अगुवा मिराज ढुंगानामाथि दुर्व्यवहार भएको छ । आफूलाई ‘जेन–जी अभियन्ता’ भन्ने देव थापाले ढुङ्गानामाथि हातपात प्रयास गरेका हुन् । नक्सालस्थित आफ्नो कार्यालयमै आएर थापाले हुलहुज्जत गरेको ढुंगानाले जानकारी दिएका छन् ।

ढुङ्गानाले आफ्नो राजनीतिक अभियान सञ्चालनका लागि खोलेको कार्यालयमा थापा आज साँझ मास्क लगाएर पुगेको जनाएका छन् । उनीसँग थिए जेन–जी अभियानमा संलग्न डा. जगत डिसी । थापाले ढुङ्गानालाई ठाडो–ठाडो कुरा गर्दै विभिन्न धाकधम्की समेत दिएको जनाइएको छ । सुधन गुरुङसँग किन मिल्न गएको भन्दै उनले मिराजलाई थर्काएका थिए ।

मिराजले भने, ‘उनी पहिले सुधन गुरुङको टिमबाट निकालिएका रहेछन् । मलाई बिना कारण आएर थर्काए । गालीगलौज र दुर्व्यवहार गरे ।’ थापालाई आफूले पहिले कहिले पनि नभेटेको र ऋषि धमलाको अन्तर्वार्तामा देखेको उनले बताएका छन् ।

हिजो धमलाले थापासहित तीन जनालाई जेनजी आन्दोलनको विषयमा अन्तर्वार्ताका लागि ल्याएका थिए । अन्तर्वार्तामा थापा मास्क लगाएरै बसेका थिए । धमलाले पटक–पटक मास्क खोल्न आग्रह गर्दा पनि उनले मानेनन् । सरकारको असंवेदनशीलताको विरुद्धमा मुख छोपेर हिँडेको उनले बताएका थिए ।