काठमाडौं । आगामी फागुन २१ गते निर्धारण भएको प्रतिनिधि सभा सदस्य निर्वाचनलाई लक्ष्य बनाएर राष्ट्रिय स्वतन्त्र पार्टी (रास्वपा) ले आन्तरिक तयारी र रणनीतिगत प्रक्रियालाई तीव्र बनाएको छ । मंगलबार र बुधबार बसेका केन्द्रीय समिति बैठकहरूलगायतका निर्णयहरू एकसाथ सार्वजनिक गर्दै रास्वपाले उम्मेदवार छनोट, संगठन विस्तार, संवाद प्रक्रिया तथा अध्ययन–अनुसन्धानसँग सम्बन्धित जिम्मेवारीहरू व्यापक रूपमा पुनः संयोजन गरेको छ ।

प्रतिनिधि सभा निर्वाचनका लागि उम्मेदवार छनोटको रूपरेखा सफलतापूर्वक तयार पारेको मूल्यांकन गर्दै सह–महामन्त्री विपिनकुमार आचार्यलाई उम्मेदवार छनोट समितिको संयोजक तोकिएको छ । आचार्य संयोजक रहेको समितिमा सचिवालय सदस्य विराजभक्त श्रेष्ठ, केन्द्रीय सदस्य डा. चन्दा कार्की, राजन गौतम तथा सबै प्रदेश सभापति पदेन सदस्य रहने छन् । रूपन्देही–३ का लागि भने पहिल्यै चयन भइसकेका डा. लेखजंग थापा नै उम्मेदवार कायम रहने निर्णय छ ।

मुद्दागत सहकार्य र सांगठनिक समन्वयलाई अघि बढाउन उपसभापति डा. स्वर्णिम वाग्ले संयोजकत्वमा रहेको उच्च संवाद समितिले अब अझ सघन रूपमा विभिन्न दल तथा समूहहरूसँग समन्वय गर्नेछ । रास्वपाले जेन–जी पुस्ताको राजनीतिक सक्रियताबाट प्राप्त उपलब्धीलाई संस्थागत गर्दै परिवर्तनकामी शक्तिसँग सहकार्य गर्ने नीति पुनः दोहोर्‍याएको छ । बैठकमा सभापति रवि लामिछानेमाथि अघिल्लो सरकारले लगाइएका मुद्दाको कानुनी अवस्थाबारे केन्द्रीय समितिलाई जानकारी गराइएको बताइएको छ ।

रास्वपाले विभिन्न कार्यदल र समितिहरू पुनर्गठन तथा विस्तार गरेको छ । संविधान एवं संविधान–सम्बद्ध कानुन परिमार्जन कार्यदल संयोजकमा सोविता गौतम, वाचापत्र कार्यदलमा क्रान्तिशिखा धिताल थपिएका छन् । यस्तै राजनीति अध्ययन कार्यदलमा संयोजक विराजभक्त श्रेष्ठ तथा प्रदेश सभापतिहरू पदेन सदस्य, निर्वाचन रणनीति कार्यदलमा संयोजक मनिष झा, मिडिया अध्ययन कार्यदल संयोजकमा निशा डाँगी रहेका छन् ।

जेन–जी पुस्ताको बढ्दो राजनीतिक सहभागितालाई औपचारिक, वैचारिक र व्यवहारिक तवरले उन्नत बनाउन रास्वपाले ‘युथ नेशन बिल्डिङ एकेडेमी’ सञ्चालन गर्ने भएको छ । यस कार्यक्रममार्फत राजनीतिक संरचना, संसदीय अभ्यास, नेतृत्व विकास र सार्वजनिक अभिव्यक्तिसम्बन्धी आधारभूत तथा उन्नत प्रशिक्षण प्रदान गरिनेछ । कार्यक्रमको संयोजन कानुन तथा मानव अधिकार विभाग प्रमुख सोविता गौतमले गर्नेछिन् ।

रास्वपाले सबै प्रदेश र ७७ जिल्लामा निर्वाचनमुखी विस्तारित बैठक सञ्चालन गर्नेछ । समावेशिताको सिद्धान्तलाई अनिवार्य पालना गर्दै केन्द्रीय समिति बाहेकका सबै रिक्त पद छिटो पूर्ति गर्न निर्देशन दिइएको छ । यसैगरी, जेन–जी समूहका युवासँग प्रदेश तथा जिल्ला तहमा छलफल-संवाद कार्यक्रम सञ्चालन गर्ने, पार्टीको सबै संयन्त्रमा युवा सहभागिता थप बढाउने र संगठनलाई निर्वाचनमुखी बनाउने कार्ययोजना अघि सारिएको छ ।