काठमाडौं । प्रधानमन्त्री सुशीला कार्कीले आगामी प्रतिनिधि सभा निर्वाचनलाई पूर्ण शान्तिपूर्ण, निष्पक्ष र भयरहित वातावरणमा सम्पन्न गर्न नेपाली सेनालाई कडा र स्पष्ट निर्देशन दिएकी छन् । नेपाली सेनाको मुख्यालय जंगी अड्डाको निरीक्षण भ्रमणका क्रममा उनले निर्वाचन सुरक्षासम्बन्धी विस्तृत जानकारी लिँदै तीन मुख्य निर्देशन जारी गरेकी हुन् ।

प्रधानमन्त्री कार्कीले देश फेरि हिंसा, अव्यवस्था वा भयको चपेटामा पर्न नदिने आफ्नो सरकारको प्रतिबद्धता दोहो¥याउँदै भनिन्, ‘आगामी चुनावमा एक थोपा पनि रगत बग्नु हुँदैन, एक जना नागरिक पनि घाइते हुनु हुँदैन ।’ उनका अनुसार विगतका निर्वाचन अनुभव र वर्तमान सुरक्षा संवेदनशीलता विश्लेषण गर्दै सबै सुरक्षा निकायबीच त्रुटिरहित समन्वय आवश्यक छ ।

जंगी अड्डामा उनले सेनालाई जनतामा सुरक्षाको प्रत्याभूति दिने सुनिश्चित कार्ययोजना बनाएर अघि बढ्न निर्देशन दिइन् । प्रहरी कारबाहीलाई सहज, सुरक्षित र प्रभावकारी बनाउने, सबै राजनीतिक दलका गतिविधि बिना अवरोध सञ्चालन हुने वातावरण सिर्जनामा सेनाले सहयोग पुर्‍याउनु पर्ने उनले औंल्याइन् । प्रधानमन्त्रीले हालैको जेनजी आन्दोलनका क्रममा लुटिएका वा हराएका हातहतियारको खोजी–नियन्त्रणमा प्रहरीसँग घनिष्ट सहकार्य गर्न पनि आदेश दिएर फरार अभियुक्तहरू पक्रन कुनै कसर बाँकी नराख्न आग्रह गरिन् ।

सुरक्षा अवस्था, चुनौती र सेनाको आगामी योजनाबारे प्रधान सेनापति अशोकराज सिग्देलसहित सैन्य नेतृत्वले विस्तृत ब्रिफिङ गरेका थिए । निर्वाचनका दिन सेनाको परिचालन ढाँचा, समन्वय प्रक्रियादेखि सम्भावित जोखिम व्यवस्थापनसम्मका योजनाको प्रस्तुतीकरण गरिएको थियो । प्रधानमन्त्री कार्कीले आन्दोलनपश्चात् बनेको सरकारको प्राथमिक जिम्मेवारी देशमा शान्ति–सुरक्षा बहाली गर्दै फागुन २१ गते हुने चुनावलाई स्वतन्त्र र निष्पक्ष बनाउनु नै रहेको बताइन् । सेनाले पाएको जिम्मेवारी सफलतापूर्वक पूरा गर्नेमा आफू विश्वस्त रहेको उनले स्पष्ट गरिन् । कार्यक्रममा गृहमन्त्री ओमप्रकाश अर्याल, कानुनमन्त्री अनिलकुमार सिन्हा, मुख्यसचिव सुमनराज अर्याललगायत उच्च पदस्थ अधिकारीहरूको उपस्थिति थियो ।

प्रधानमन्त्रीका मुख्य तीन निर्देशन
– जनतालाई सुरक्षाको प्रत्याभूति दिन, प्रहरी कारबाहीलाई सहजीकरण, सहयोग र सुरक्षित गर्न तथा सबै राजनीतिक दलका राजनीतिक गतिविधिहरुलाई बिनाअवरोध सञ्चालन गर्ने वातावरण सिर्जना गर्न स्पष्ट कार्ययोजनासहित अघि बढ्नू ।
– आगामी चुनावमा एक थोपा पनि रगत बग्नु हुँदैन र एक जना पनि घाइते हुनुहुँदैन । यसअघिका चुनावको समेत अनुभव र आसन्न चुनावका विविध आयामबाट विश्लेषण गरी सुरक्षा संवेदनशीलताका आधारमा सबै सुरक्षा निकायहरुसँगको समन्वयात्मक र त्रुटिरहित ढंगले काम गर्नू ।

– जेनजी आन्दोलनको क्रममा लुटिएका र हराएका हातहतियारको खोजी तया नियन्त्रणमा लिन प्रहरीलगायत सुरक्षा निकायसँग सहकार्य गरी स्थिति सामान्य पार्ने र फरार अपराधी पक्रन प्रहरीलाई सहयोग गर्न पनि कुनै कसर बाँकी नराखी खटिनू ।