काठमाडौं । दोस्रो संस्करणको नेपाल प्रिमियर लिग (एनपीएल) अन्तर्गत आजको दोस्रो खेलमा पोखरा एभेन्जर्स र कर्णाली याक्स भिड्दै छन् । त्रिभुवन विश्वविद्यालय अन्तर्राष्ट्रिय क्रिकेट मैदान, कीर्तिपुरमा कर्णालीले टस जितेर फिल्डिङ रोजेपछि पोखराले पहिला ब्याटिङ गर्ने भएको छ ।

दुवै टोलीका लागि यो खेल ‘प्लेअफ’ मा पुग्न महत्वपूर्ण छ । चार खेलमा एक खेल मात्रै जितेको पोखरालाई यो खेल जिते प्लेअफको यात्रामा अघि बढ्न सहज हुनेछ । कर्णालीका लागि पनि प्लेअफमा पुग्न यो खेल जित्नैपर्ने हुन्छ । यसअघि आजै भएको पहिलो खेलमा जनकपुरले चितवनलाई ६ विकेटले हराएको थियो । कर्णालीले आजको खेलमा तीन खेलाडी परिवर्तन गरेको छ। दिपक डुम्रे, युवराज खत्री र विलियम वसिस्टोलाई बेन्चमा राखेको छ । पोखराले आजको खेलमा पाँच खेलाडी परिवर्तन गरेको छ । अघिल्लो खेलमा रहेका दिनेश खरेल, अविशेक तिवारी, सुमित बर्मा, जिम्मी निसम र म्याट टेलरलाई बाहिर राखेको छ ।

पोखरा एभेन्जर्सको टोली : कुशल मल्ल, किरण ठगुन्ना, सागर ढकाल, आकाश चन्द, विपिन खत्री, तृतराज दास, सन्दीप केसी, आडम रोसिङटन, जेसन रोय, ऋषी धवन र धनन्जय लक्सन।

कर्णाली याक्सको टोली : सोमपाल कामी, दीपेन्द्र रावत, पवन सर्राफ, नन्दन यादव, विपिन शर्मा, युनिस ठकुरी, गुल्सन झा, मार्क वाट, नजिबुल्लाह जड्रान, प्रियांक पञ्चाल र जय किसन कोल्सावाला ।