इजरायल ।  इजरायलका प्रधानमन्त्री बेन्जामिन नेतन्याहुले बुधबार भारतका प्रधानमन्त्री नरेन्द्र मोदीलाई फोन गरेका छन् ।

प्रधानमन्त्री मोदीले सामाजिक सञ्जाल एक्समार्फत बुधबार नेतन्याहुसँग फोन संवाद भएको जानकारी दिएका हुन् ।
उनले एक्समा लेखेका छन्, ‘मैले मेरा साथी प्रधानमन्त्री नेतन्याहुसँग कुरा गरेँ। हामीले भारत-इजरायल रणनीतिक साझेदारीमा भएको प्रगतिको समीक्षा गर्‍यौँ र हाम्रो सहयोगलाई अझ बलियो बनाउन सहमती भएको छ ।

हामीले आतंकवादप्रति शून्य सहनशीलताको हाम्रो साझा प्रतिबद्धता पनि दोहोर्‍यायौँ । भारतले यस क्षेत्रमा दिगो शान्ति प्राप्त गर्ने सबै प्रयासको समर्थन गर्छ।’ पीआईबीले विज्ञप्ति जारी गरी मोदी र नेतन्याहुले गाजा शान्ति योजनाको प्रारम्भिक कार्यान्वयनबारे पनि छलफल भएको जानकारी दिएको छ ।

इजरायली प्रधानमन्त्रीको कार्यालयले एक्समा लेखेको छ, ‘दुई नेताबीच आत्मीय कुराकानी भयो र चाँडै भेट्ने सहमती भएको छ ।’

समाचार एजेन्सी पीटीआईका अनुसार, भरपर्दो इजरायली स्रोतले दिल्ली बम विस्फोटपछि सुरक्षा चिन्ताका कारण नेतन्याहुले भारतको भ्रमण स्थगन गरेको भन्ने भएको हल्ला लाई अस्विकार गरेका छन् ।