दक्षिण अमेरिका ।  दक्षिण अमेरिकामा तनाव बढेको छ । अमेरिकाले बुधबार भेनेजुएलाको तटबाट एउटा तेल ट्यांकर कब्जा गरेको छ ।

अमेरिकाका राष्ट्रपति डोनाल्ड ट्रम्पले ह्वाइट हाउसमा पत्रकारहरूलाई भनेका छन्, ‘हामीले भर्खरै भेनेजुएलाको तटबाट एउटा ट्यांकर कब्जा गरेका छौँ । वास्तवमा अहिलेसम्मकै सबैभन्दा ठूलो जफत गरिएको हो ।’ अमेरिकी महान्यायाधिवक्ता पाम बोन्डीको दाबी अनुसार ट्यांकर धेरै वर्षदेखि प्रतिबन्धमा थियो किनभने यो ‘विदेशी आतंकवादी संगठनहरूलाई समर्थन गर्ने अवैध तेल ढुवानी नेटवर्क’सँग जोडिएको थियो ।

उनले सामाजिक सञ्जालमार्फत अमेरिकी सेना हेलिकप्टरबाट जहाजमा चढेको देखाइएको क्लिप पोस्ट गरेकी छिन्। त्यस लगतै भेनेजुएला सरकारले कडा प्रतिक्रिया जनाएको छ । अमेरिकाले ‘चोरी’ र ‘अन्तर्राष्ट्रिय सामुद्रिक लुटपाट’ गरेको संज्ञा दिएको छ ।

भेनेजुएला सरकारले यस अघिदेखि अमेरिकाले वास्तवमा राष्ट्रपति निकोलस मादुरोलाई हटाउन खोजिरहेको आरोप लगाइरहेको छ। अमेरिकाले हालैका हप्ताहरूमा यस क्षेत्रमा आफ्नो सैन्य उपस्थिति बढाएको छ । उसले लागुपदार्थ तस्करीविरुद्धको अभियान सन्चालन गरेको छ।