काठमाडौं । प्रतिनिधि सभा सदस्य उम्मेदवारका लागि डडेल्धुराबाट नेपाली कांग्रेसले पूर्व प्रधानमन्त्री एवं सपभाति शेरबहादुर देउवाको नाम सर्वसम्मत रुपमा एकल सिफारिस गरेको छ । बिहीबार बसेको कांग्रेस जिल्ला कार्यसमितिको बैठकले देउवाको नाम सिफारिस गरेको जिल्ला सचिव हेमराज चटौतले जानकारी दिए । ‘डडेल्लधुराबाट सर्वसम्मत रुपमा सभापति ज्यूको एकल नाम सिफारिस गरेका छौँ,’ सचिव चटौतले भने ।

त्यस्तै, समानुपातिक उम्मेदवारका लागि नरभान कामी र मानकुमारी थापाको नाम सिफारिस गरिएको छ । कांग्रेस डडेल्धुराले राष्ट्रिय सभाको उम्मेदावरका भीमबहादुर साउँद र रघुवर भट्टको नाम सिफारिस गरिएको सचिव चटौतले जानकारी दिए । जिल्ला कार्यसमितिले प्रदेश कार्यसमितिलाई नाम सिफारिस गरेको हो । अब प्रदेशले कांग्रेस केन्द्रमा नाम पठाउनेछ । त्यसपछि कांग्रेस केन्द्रले उम्मेदवार तय गर्नेछ ।

सभापति देउवा २०४८ सालदेखि डडेल्धुराबाट लगातार निर्वाचन जित्दै आएका छन् । जेनजी आन्दोलनका क्रममा सांघातिक आक्रमणमा परी घाइते भएका देउवाले केही दिनअघि मात्रै अन्तिम पटक निर्वाचन लड्ने इच्छा देखाएका थिए । सभापति देउवा डडेलधुराबाट आठौं पटक सांसदको निर्वाचन लड्ने तयारीमा देखिएका हुन् । यसअघि उनी २०४८, ०५१, ०५६, ०६४, ०७०, ०७४ र ०७९ सालमा भएको निर्वाचनमा डडेलधुराबाटै विजयी भइसकेका छन् ।