काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने रिहाइपछि पुनः पार्टी गतिविधिमा सक्रिय बनेका छन् । शुक्रबार रिहा भएका लामिछानेको नेतृत्वमा पार्टीले संगठनात्मक गतिविधि तीव्र बनाएको छ भने समानुपातिक उम्मेदवार छनोट प्रक्रिया पनि निर्णायक चरणमा पुगेको छ ।

रास्वपाले आज अपराह्न ४ बजेका लागि केन्द्रीय समितिको बैठक बोलाएको छ । सभापति लामिछानेको अध्यक्षतामा बस्ने उक्त बैठकमा उनले समसामयिक राजनीतिक अवस्था र पार्टीको आगामी रणनीतिबारे सम्बोधन गर्ने प्रवक्ता मनिष झाले जानकारी दिए । बैठकअघि दिउँसो ३ बजे पार्टी नेता–कार्यकर्ताले घण्टीघर क्षेत्रमा सभापति लामिछानेलाई स्वागत गर्ने कार्यक्रम पनि तय गरिएको छ ।

रिहाइपछिका दिनहरूमा लामिछाने निरन्तर सक्रिय देखिएका छन् । शनिबार चितवनमा आयोजित सभालाई सम्बोधन गरेपछि उनी काठमाडौं फर्किएर जेनजी आन्दोलनका क्रममा सहिद भएका परिवारसँग भेटघाटमा समेत सहभागी भएका थिए । सहकारी ठगी प्रकरणमा लामिछाने जेल चलान भएपछि डोलप्रसाद अर्यालले कार्यवाहक सभापतिको जिम्मेवारी सम्हालेका थिए । लामिछाने रिहा भएसँगै रास्वपाले उनी पार्टी गतिविधिमा पूर्ववत् रूपमा संलग्न हुने स्पष्ट पारेको थियो ।

यता, रास्वपाले समानुपातिकतर्फ उम्मेदवार छनोट प्रक्रिया पनि अघि बढाएको छ । पार्टीले बनाएको मापदण्डअनुसार प्रारम्भिक मतदानमार्फत उम्मेदवार छनोट गर्ने व्यवस्था गरिएको छ । समानुपातिकतर्फका आकांक्षीलाई सबै क्षेत्रबाट मतदान गर्न पाउने व्यवस्था छ । यसैक्रममा प्रारम्भिक सूचीमा परेका आकांक्षीसँग पार्टीले सबै प्रदेशमा छलफल गरिसकेको छ । छनोट प्रक्रियाको अर्को चरणका रूपमा आज आकांक्षी उम्मेदवारहरूलाई विभिन्न क्षेत्रमा घरदैलो अभियानका लागि खटाइएको छ । भक्तपुरको गुण्डु क्षेत्रमा रास्वपाका समानुपातिकतर्फका आकांक्षी उम्मेदवारले घरदैलो अभियान सञ्चालन गरेका छन् । गुण्डु नेकपा एमालेका अध्यक्ष केपी शर्मा ओलीको निवास रहेको क्षेत्रका रूपमा पनि परिचित छ ।

समानुपातिक उम्मेदवार छनोट प्रक्रियाअन्तर्गत आकांक्षी प्रदीप तिमिल्सिना (साजन) को नेतृत्वमा गुण्डु क्षेत्रमा घरदैलो गरिएको हो । ‘घरदैलो अभियानका लागि पार्टीले मलाई गुण्डुमा खटाएको हो । र्‍यापिड एक्सन टिमको संयोजक भएकाले पार्टीले जिम्मेवारी दिएको होला,’ साजनले बताए । रास्वपाले उद्दार, राहतलगायतका कार्यमा स्वयंसेवी रूपमा सक्रिय रहने उद्देश्यसहित ¥यापिड एक्सन टिम (र्‍याट) गठन गरेको छ । युवाहरूलाई समेटेर बनाइएको उक्त संगठनको संयोजक साजन नै हुन् । रास्वपाबाट समानुपातिक उम्मेदवारका आकांक्षीका रूपमा ३५३ जनाको नाम सार्वजनिक भइसकेको छ । पार्टीले आन्तरिक छनोट प्रक्रिया पूरा गरी १४ पुसमा अन्तिम सूची सार्वजनिक गर्ने जनाएको छ । पार्टी नेतृत्वको सक्रियता र जमीनी अभियानसँगै रास्वपाले आगामी राजनीतिक यात्रालाई थप गतिशील बनाउने संकेत देखिएको छ ।