काठमाडौं । नेकपा नेता वर्षमान पुनले घोषित मितिमा नै निर्वाचन सम्पन्न गरिनुपर्ने बताएका छन् । संविधानविपरीत निर्वाचन सार्ने कुनै पनि प्रयास स्वीकार्य नहुने चेतावनी दिँदै उनले निर्वाचन सम्पन्न गराउन सबै राजनीतिक दलले सरकारलाई सहयोग गर्नुपर्ने बताएका हुन् ।

सिंहदरबारमा आयोजित सर्वपक्षीय छलफललाई सम्बोधन गर्दै नेता पुनले निर्वाचन राज्यलाई निकास र स्थायित्व दिने प्रमुख आधार भएकाले यसमा अनावश्यक अन्योल सिर्जना गर्न नहुने धारणा राखे । उनका अनुसार प्रारम्भिक दिनमा सरकारले निर्वाचनलाई पछि सार्ने हो कि भन्ने आशंका भए पनि अहिले सरकार घोषित मितिप्रति प्रतिबद्ध देखिनु सकारात्मक संकेत हो ।

‘घोषित मितिमै निर्वाचन सम्पन्न गराउने विषयमा सरकारको प्रतिबद्धता सराहनीय छ’, उनले भने, ‘यसका लागि हाम्रो दल सरकारप्रति आभार व्यक्त गर्दछ । निर्वाचन प्रक्रिया सुरु भइसकेपछि बीचमै नियम परिवर्तन गर्नु हुँदैन, त्यसो गरियो भने द्वन्द्व र अस्थिरता निम्तिन सक्छ ।’ नेता पुनले प्रमुख राजनीतिक दलहरू चुनावी प्रक्रियामा प्रवेश गरिसकेको र नयाँ पुस्ता अर्थात् ‘जेन–जी’ समूहको समेत सहभागिता बढ्दै जानु लोकतन्त्रका लागि सकारात्मक पक्ष भएको उल्लेख गरे । उनले यस्तो वातावरणलाई अझ सुदृढ बनाउन सरकार गम्भीर हुनुपर्ने धारणा राखे । उनले संविधानले तोकेको समय सीमाभन्दा बाहिर गएर निर्वाचन धकेल्ने प्रयास भए सरकारलाई समर्थन नहुने स्पष्ट पारे । ‘यदि ६ महिनाभित्र नयाँ संसद गठन हुन सकेन भने निर्णय सडकबाट हुन्छ वा पुरानै संसद पुनःस्थापना हुने अवस्था आउन सक्छ’, उनले चेतावनी दिए, ‘यी विषयमा हामी स्पष्ट छौँ ।’

नेता पुनले निर्वाचनको अनुकूल वातावरण निर्माणका लागि सरकारले प्रमुख राजनीतिक दलका शीर्ष नेताहरूसँग निरन्तर संवाद अघि बढाउनुपर्ने आवश्यकता पनि औंल्याए । संवाद र सहमतिमार्फत मात्रै लोकतान्त्रिक प्रक्रियालाई सुरक्षित राख्न सकिने उनको भनाइ थियो । समग्रमा, नेता पुनले निर्वाचनलाई राजनीतिक स्थायित्व र संविधानको कार्यान्वयनसँग जोडिएको विषयका रूपमा व्याख्या गर्दै, घोषित मितिमा निर्वाचन सम्पन्न गर्नु नै वर्तमान परिस्थितिको एकमात्र लोकतान्त्रिक निकास भएको दोहो¥याए ।