काठमाडौं । जेनजी आन्दोलनमा ज्यान गुमाएका युवाका परिवारहरू संसदमा पुग्ने देखिएका छन् । प्रमुख दुई दल-नेपाली कांग्रेस र राष्ट्रिय स्वतन्त्र पार्टी (रास्वपा) ले जेनजी आन्दोलनका शहीद परिवारका सदस्यलाई समानुपातिक सांसद उम्मेदवारको सूचीमा समेटेका छन् । नेपाली कांग्रेसले भदौ २४ गते जेनजी प्रदर्शनका क्रममा प्रहरीको गोलीबाट मृत्यु भएका धिरज श्रेष्ठका बुबा नारायण श्रेष्ठलाई समानुपातिक उम्मेदवार बनाएको छ । आदिवासी जनजाति क्लस्टरबाट सूचीकृत नारायण काठमाडौं निवासी हुन् । उनी जेनजी शहीद परिवार कल्याणकारी समाजका अध्यक्ष समेत हुन् । संस्थाका पूर्व अध्यक्ष भोजविक्रम थापाले स्वास्थ्य कारणले राजीनामा दिएपछि श्रेष्ठ निर्विरोध रूपमा नेतृत्वमा आएका थिए ।

उता, रास्वपाले भदौ २३ गते जेन–जी आन्दोलनमा शहीद भएका काभ्रेका २३ वर्षीय रसिक खतिवडाकी आमा रचना खतिवडालाई समानुपातिक सूचीमा समेटेको छ । उनी खस–आर्य महिला क्लस्टरबाट नवौं नम्बरमा छिन् । पार्टीको सूचीमा नाम परेको खबरले रचना अचम्म र खुशी दुवैमा परेकी छन् । ‘छोराको सपना पूरा गर्न पाउँछु कि भन्ने आशा जागेको छ’, उनले प्रतिक्रिया दिइन् ।

शहीद छोराको न्यायका लागि सडकदेखि सिंहदरबार र बालुवाटारसम्म पुगेकी रचनाको आवाजलाई रास्वपाले राजनीतिक प्रतिनिधित्वमा रूपान्तरण गर्न खोजेको देखिन्छ । सहकारी ठगी प्रकरणमा धरौटीमा रिहा भएपछि रास्वपा सभापति रवि लामिछाने स्वयं जेनजी शहीद परिवारलाई भेट्न पुगेका थिए । त्यसयता रचनासँग निरन्तर सम्पर्क र कागजात संकलन हुँदै आएको थियो ।

‘हामीले पुरानो दलहरुलाई जितायौँ, तर हाम्रै बच्चा मारिए’, रचनाले भनिन्, ‘अब नयाँलाई साथ दिनुपर्छ । संसदमा पुगेँ भने कम्तीमा दुई शब्द बोल्न त पाउँछु ।’ उनका अनुसार, संसद पुगेपछि छोराले उठाएका मुद्दा र आफू जस्तै पीडित आमाहरूको आँशुको मूल्य खोज्नु नै उनको प्राथमिकता हुनेछ। धिरज र रसिक—दुवै युवाको मृत्युले जेनजी आन्दोलनलाई मात्र होइन, देशको राजनीति पनि गहिरो रूपमा छोएको छ । शहीदका परिवारलाई संसदमा पुर्‍याउने यी कदमलाई कसैले सहानुभूतिको राजनीति त कसैले पीडितको आवाजलाई राज्यको केन्द्रमा पुर्‍याउने प्रयासका रूपमा हेरेका छन् । जे होस्, जेनजी आन्दोलनका शहीदका घरआँगनबाट अब आवाज संसदभित्रै उठ्ने संकेत देखिएको छ ।