काठमाडौं । नेपाली कांग्रेसको केन्द्रीय कार्यसम्पादन समिति बैठक बसिरहेको छ । केहीबेर अघिबाट केन्द्रीय कार्यालय सानेपामा बैठक सुरु भएको हो । बैठकमा राष्ट्रियसभा निर्वाचन, पार्टीभित्रको आन्तरिक विषयवस्तुलगायत वर्तमान राजनीतिक अवस्थाबारे छलफल हुने जनाइएको छ । कांग्रेसले राष्ट्रियसभा निर्वाचनमा गठबन्धन गर्न एमाले र नेकपासँग छलफल गरिरहेको छ । त्यसबारे आजको बैठकले निर्णय लिनसक्ने जनाइएको छ ।

यस्तै, यसअघि बसेको बैठकले वैशाखमा पार्टीको नियमित महाधिवेशन गर्ने कार्यतालिका ल्याएको थियो । तर महामन्त्रीद्वय गगन थापा र विश्वप्रकार्श शर्माले यही महिनाभित्रै विशेष महाधिवेशन गर्ने अडान लिइरहेका छन् । महाधिवेशन विवाद चर्किएपछि निकासको लागि आजको बैठकमा छलफल हुने जनाइएको छ ।

सोमबारको बैठकमा विशेष महाधिवेशनको विषय एजेण्डामा नरहेको पार्टी कार्यालय स्रोतले जानकारी दिएको छ । महामन्त्रीद्वय गगन थापा र विश्वप्रकाश शर्माले पुस २८ र २९ गतेका लागि विशेष महाधिवेशन बोलाएपछि कांग्रेसमा विवाद चुलिएको छ । संस्थापन पक्षले विशेष महाधिवेशनमा नआउन प्रतिनिधिहरूलाई परिपत्र गरेको छ । तल्ला कमिटीलाई महाधिवेशनको नयाँ कार्यतालिका समेत पठाइसकेको छ ।