काठमाडौं । नेपाली कांग्रेस पार्टी कार्यालय बाहिर प्रदर्शनरत कार्यकर्ताले नेताहरूलाई पार्टी कार्यालय प्रवेश गर्न अवरोध गरेका छन् । प्रदर्शनरत कार्यकर्ताले पार्टीलाई बन्दी बनाउन नहुने भन्दै नारावाजी समेत गरेका छन् । यस क्रममा केही नेतासँग प्रदर्शनरत कार्यकर्ताको बाझाबाझ समेत भएको छ । विशेष महाधिवेशन पक्षधर नेताहरूलाई पार्टी कार्यालय प्रवेशमा रोक लगाइएपछि उनीहरूले पनि अर्को खेमाका नेताहरूलाई भित्र छिर्न अवरोध गरेका छन् ।

पार्टीका पूर्व उपसभापति विमलेन्द्र निधिलाई पार्टी कार्यालय प्रवेशका क्रममा अवरोध भएको हो । त्यसक्रममा धकेलाधकेलको स्थिति समेत आएको छ । निधिसहितको समूह कुनै पनि हालतमा विशेष महाधिवेशन गर्न नहुने पक्षमा छ । नेपाली कांग्रेसका ५४ प्रतिशत महाधिवेशन प्रतिनिधिले विशेष महाधिवेशन माग्दै हस्ताक्षर बुझाएको यही पुस अन्तिममा ३ महिना पुग्दैछ । कम्तीमा ४० प्रतिशत प्रतिनिधिले माग गरेमा ३ महिनाभित्र विशेष महाधिवेशन बोलाउनैपर्ने बाध्यकारी व्यवस्था कांग्रेसको विधानमा छ ।

तर, संस्थापन पक्ष बलियो रहेको केन्द्रीय कार्यसम्पादन समितिले आगामी वैशाख २८–३१ मा महाधिवेशन गर्ने गरी कार्यतालिका ल्याइसकेको छ । यता विशेष महाधिवेशन पक्षधरहरू भने यही पुस २७ र २८ का लागि हल बूक समेत गरेर तयारीमा जुटेका छन् । आज बोलाइएको केन्द्रीय कार्यसम्पादन समितिको बैठकको लागि नेताहरू वैकल्पिक गेटबाट पार्टी कार्यालय प्रवेश गरिरहेका छन् । बिहान ११ बजे हुने भनिएको बैठक १ बजेको लागि सरे पनि अहिलेसम्म सुरू हुन सकेको छैन ।

तस्वीरहरु : नेपाल फोटो लाइब्रेरी