काठमाडौं । राष्ट्रिय सभाको निर्वाचनमा नेपाली कांग्रेसका नेता डा. शेखर कोइराला पक्षले तीन सिट पाएको छ । एमालेसँग तालमेल गरी ९ सिट पाएकोमध्ये कोइराला पक्षलाई तीन सिट छुट्याइएको हो । शेखर पक्षले मधेशबाट रञ्जित कर्ण, लुम्बिनीबाट बासुदेव जंगली बागमतीबाट गीता देवकोटा उम्मेदवार अघि सारेको छ । यी बाहेक कांग्रेसले अघि सारेको उम्मेदवार सबै सभापति शेरबहादुर देउवा निकट हुन् ।

महामन्त्रीद्वय गगन थापा र विश्वप्रकाश शर्मा समूहले एक सिट पनि पाएनन् । उम्मेदवार टुङ्ग्याउने बैठक महामन्त्री शर्माले बैठक बहिष्कार गरेका छन् । नेता अर्जुनसिंह केसीले उम्मेदवार छनोट प्रक्रियामा आफ्नो असहमति रहेको बताए । सभापतिको खल्तीबाट उम्मेदवार ल्याएर ६० ४० को भागबण्डामा उम्मेदवार छनोट गरिएको भन्दै आपत्ति जनाए । कांग्रेसबाट कोशी प्रदेशबाट सुनिलबहादुर थापा (अन्य), मधेश प्रदेशबाट धर्मेन्द्र पासवान (दलित), गण्डकी प्रदेशबाट जगत तिमिल्सिना (अन्य), लुम्बिनी प्रदेशबाट चन्द्रबहादुर केसी (अन्य), कर्णाली प्रदेशबाट ललतिजंग शाही (अन्य) र सुदूरपश्चिम प्रदेशबाट खम्मबहादुर खाती (अन्य) लाई उम्मेदवार बनाइएको छ ।