काठमाडौं । नेपाली कांग्रेसका नेता देवराज चालिसे आफूहरूले पार्टी रूपान्तरणको प्रयास गरेको बताएका छन् । विशेष महाधिवेशन उद्घाटन समारोहलाई सम्बोधन गर्दै पार्टी रूपान्तरणको लागि पार्टीभित्र झगडा गरेको बताए । उनले भने, ‘सत्तासँग सिद्धान्त बेच्ने राजनीतिले भ्रष्टाचारको सुरुआत भयो । त्यति मात्रै होइन चुनावअघि गठबन्धनको प्रयास हुँदै छ । त्यसले हाम्रो सिद्धान्तलाई कहाँ पुर्‍याउँछ ? आदर्शलाई कहाँ पुर्‍याउँछ ?’

उनले पार्टीको आयु सत्ता र सीटसँग नभई जनताको मनसँग जोडिन्छ भन्ने कुरा ख्याल गर्नुपर्ने बताए । उनले पार्टीको विधानअनुसार आफूहरूले विशेष महाधिवेशन गरेको बताए । उनले भने, ‘विधान लागू गर्दा पार्टी फुट्छ भने त्यो विधान खारेज गर्नुस्, अन्यथा पार्टीको विधान उल्लङ्घन गर्ने अधिकार सभापति र केन्द्रीय समितिलाई छैन ।’ नेता चालिसेले विशेष महाधिवेशनको हलबाट हुने निर्णय सबैले मान्नुपर्ने बताए ।

चालिसेले कसैको प्रभावमा नपरेर हलले निर्णय गर्ने बताए । सभापति शेबहादुर देउवालाई विधानअुनसार, विशेष महाधिवेशनको गर्न आग्रह गर्दा नमानेपछि आफूहरू सरेको उनको भनाइ थियो । अब विशेष महाधिवेशनले गर्ने निर्णय सबैले मान्नुपर्ने बताए । ‘हलभित्र पसेपछि हुने निर्णय शेरबहादुर देउवाले मान्नुुर्पछ, वडाको सदस्यले पनि मान्नु पर्छ,’ चालिसेले भने । विशेष महाधिवेशनका लागि अभियान चलाउने कांग्रेस नेतामध्ये चालिसे पनि एक हुन् । पार्टीलाई सुधार गर्न बाध्यकारी कदम चाल्नु परेको उनको भनाइ थियो ।