काठमाडौं । उज्यालो नेपाल पार्टीका कम्तीमा २० नेताहरू राष्ट्रिय परिवर्तन पार्टीको बन्दसूचीमा समावेश भएका छन् । जेनजी आन्दोलनमा घाइते भएका युवा राजेश पोर्तेल यो परिवर्तन पार्टीका अध्यक्ष हुन् । पोर्तेलले अधिकांश जेनजी युवाहरूलाई नै समावेश गरेर पार्टी दर्ता गरेका थिए । पार्टीले समानुपातिक उम्मेदवारहरुको बन्दसूची पनि बुझाइसकेको छ । उक्त सूचीमा रहेका नामहरु फिर्ता लिएर उज्यालो नेपालका तर्फबाट नाम समावेश गरिएको हो ।

उज्यालो नेपालका संस्थापक अध्यक्ष रहेका अनुपकुमार उपाध्याय खस आर्यतर्फ पहिलो स्थानमा रहेका छन् । उनी रास्वपाको पनि बन्द सूचीमा थिए । रास्वपाबाट नाम फिर्ता लिएर उनी यता आएको बुझिएको छ । केन्द्रीय सदस्य रिमा विश्वकर्मा भने रास्वपाकै सूचीमा यथावत छिन् ।

दुई साताअघि राष्ट्रिय स्वतन्त्र पार्टीमा समाहित हुने निर्णय गर्दा निर्वाचन आयोगमा समानुपातिक बन्दसूची बुझाउने अवसर गुमाइसकेको उनेपाले अब राष्ट्रिय परिवर्तन पार्टीले बुझाएको बन्दसूची हेरफेर गर्दै अद्यावधिक गर्न लागेको हो । उनेपा अध्यक्ष कुलमान घिसिङले चुनाव तालमेलको लागि अन्य साना दलहरुसँग पनि छलफल गरिरहेको खबर बाहिरिएको छ ।