काठमाडौं । नेपाली कांग्रेसमा आन्तरिक विवाद गहिरिँदै गएपछि पार्टी अध्यक्ष शेरबहादुर देउवाको नेतृत्वमा संकट व्यवस्थापन प्रयासहरू तीव्र बनेका छन् । केन्द्रीय समिति बैठकका लागि पार्टी कार्यालय सानेपा पुगेका नेता डा. शेखर कोइरालाले पार्टी तत्काल फुट्ने स्थिति नरहेको दाबी गरेका छन् ।

सानेपामा बुधबार दिउँसो पत्रकारसँग कुरा गर्दै कोइरालाले भने, ‘यत्तिकै पार्टी फुट्छ ?’ उनले हिजो र आज पार्टी सभापति शेरबहादुर देउवासँग परामर्श गरेका थिए भने कार्यवाहक सभापति पूर्णबहादुर खड्कासँग समेत छलफल गरेका छन् । सानेपामा बस्ने बैठक विशेष महाधिवेशन पक्षधरले नयाँ नेतृत्व चयनको तयारी गरिरहेको समयमा भएको हो । संस्थापन पक्षले भने विशेष महाधिवेशन पक्षधरलाई कारबाही गर्ने तयारीमा रहेको बेला कोइरालाको सानेपा उपस्थितिले राजनीतिक सन्तुलन कायम राख्ने संकेत दिएको देखिन्छ ।

यसैबीच, पार्टीको आन्तरिक विवादमा महासचिव मोहनबहादुर बस्नेतले गगन थापा र विश्वप्रकाश शर्मामाथि कटाक्ष गरेका छन् । भ्रष्टाचार मुद्दा खेपिरहेका बस्नेतले पार्टी कार्यालयमा पत्रकारसँग कुरा गर्दै भने, ‘यस्ता नौटङ्कीबाजलाई मेरो समर्थन छैन । त्यस्ता आलाकाँचाले कांग्रेस जस्तो पार्टी चलाउन सक्छन् ?।’ भावी प्रधानमन्त्री बन्न चाहेको उम्मेदवारको निर्वाचन क्षेत्र नै स्पष्ट नभएको उल्लेख गर्दै गगन–विश्व समूहको नेतृत्व क्षमता प्रश्न गरेका छन् । त्यसैगरी, विशेष महाधिवेशन आयोजना गर्नेमध्येका महामन्त्री गगन थापा र विश्वप्रकाश शर्माले सभापति देउवासँग पठाएको ८ बुँदे प्रश्नको जवाफ नआएपछि भृकुटीमण्डपमा पनि अन्योलता छाएको छ ।

निर्वाचन प्रक्रिया सुरु भइसकेको र उम्मेदवारको मनोनयन सकिएको अवस्थामा जवाफ नआउँदा विशेष महाधिवेशन स्थलमा अनिश्चितता बढेको छ । यसले विशेष महाधिवेशन पक्षधरलाई कारबाही गर्ने योजना समेत ढिलाइमा परेको देखिएको छ । विशेषज्ञहरूले नेपाली कांग्रेसको यो विवादलाई पार्टीको आन्तरिक शक्ति सन्तुलन र नेतृत्व परिवर्तनको संवेदनशील परीक्षणको रूपमा व्याख्या गरेका छन् । पार्टीको संस्थापन र विशेष महाधिवेशन पक्षबीचको तनाब अझै केही दिन जारी रहन सक्ने सम्भावना देखिन्छ ।