काठमाडौं । नेपाली कांग्रेसको संस्थापन पक्षले साधारण सदस्यतासमेत नरहनेगरि पाँच वर्षसम्मका लागि निष्कासन गरेपछि नेता विश्‍वप्रकाश शर्माले आफूहरूले सारेका आठ बुँदा पार्टी र देशको अहित गर्ने नभएको दाबी गरेका छन् ।

उनले प्रश्‍न गरे, ‘सहमतिका लागि आज बिहान प्रस्तावित यी ८ बुँदामध्ये कुन बुँदा काँग्रेस र देशको अहितमा थियो र छ ?’

उनले बुधबार बिहान सभापति देउवासँग छलफल गर्दा अघि आफूहरूले सारेका आठ बुँदा पनि सार्वजनिक गरेका छन् ।

उनले ती बुँदाहरू कांग्रेस र देशलाई बदल्ने प्रयासमा अर्का महामन्त्री गगन थापा र आफू दृढ रहेको पनि बताए ।

विधान अनुरूपको विशेष महाधिवेशन भन्दै देशलाई विशेष महाधिवेशनले सही दृष्टिकोण दिएको र सही नेतृत्व पनि दिने लेखेका छन् ।

यस्ता थिए गगन–विश्वले अघि सारेका आठ बुँदा

१. विशेष महाधिवेशनको स्वामित्व साझा रूपमा लिने
२. विशेष महाधिवेशन परिमार्जनसहित पारित प्रस्तावहरू कार्यान्वयन गर्ने
३. सभापतिले सक्रिय भूमिका निर्वाह नगर्ने सो क्रममा उम्मेदवारी पत्रमा सभापतिले हस्ताक्षर नगर्ने
४. उम्मेदवार चयन गर्न संसदीय बोर्ड गठन गर्ने
५. आगामी निर्वाचनमा एक ढिक्का भएर मैदानमा जाने
६. कुनै पनि दलसँग गठबन्धन नगरेर नेपाली कांग्रेसले आगामी निर्वाचनमा एक्लै प्रतिस्पर्धा गर्ने
७. नेपाली कांग्रेसका तर्फबाट आगामी निर्वाचनमा प्रधानमन्त्रीको उम्मेदवार घोषणा गरेर जाने
८. यी सबै कार्य समन्वय र कार्यान्वयन गराउन ५ सदस्यीय संरचना गठन गर्ने, जसमा कार्यवाहक सभापति र दुई महामन्त्रीबाहेक थप दुई नेताहरू रहने
।