काठमाडौं । गगन थापा नेतृत्वको नेपाली कांग्रेसमा प्राज्ञिक तथा वैचारिक नेताको छवि बनाएका नेता नरेन्द्रकुमार केरूङ केन्द्रीय सदस्य बनेका छन् ।

लामो समय शिक्षण पेशामा संलग्न रहँदै राजनीतिलाई वैचारिक धरातलमा अगाडि बढाएका केरूङ पाँचथर बहुमुखी क्याम्पसका पूर्व उपप्राध्यापक हुन् ।

उनी पार्टीका नीति, विचार र लोकतान्त्रिक मूल्यका विषयमा निरन्तर बहस गर्दै आएका नेता हुन् ।

उनले सभापति हुँदै पाँचथर कांग्रेसको दुई कार्यकाल नेतृत्व गरे । त्यतिबेला पार्टी संगठन विस्तार, कार्यकर्ता परिचालन र स्थानीय तहमा कांग्रेसको प्रभाव बढाउन उनी सक्रिय भए ।

उनै केरुङ पार्टीको १४औँ महाधिवेशनमा केन्द्रीय सदस्य पदका उम्मेदवार बनेका थिए । त्यसबेला पराजित भए । तर, महाधिवेशनमा हारपछि पनि उनले पार्टी गतिविधिबाट आफूलाई टाढा राखेनन् । बरु कांग्रेस पार्टीमा रुपान्तरणको बहस चलाए ।

यसपटक गगन थापा नेतृत्वमा कांग्रेसको नयाँ केन्द्रीय समिति बन्दा उनी केन्द्रीय सदस्यमा समेटिए ।

कांग्रेसभित्र युवा नेतृत्व, संगठनात्मक सुधार र वैचारिक स्पष्टतामा जोड दिइँदै आएको सन्दर्भमा केरूङको केन्द्रीय सदस्यमा चयनलाई अर्थपूर्ण रूपमा हेरिएको छ ।