काठमााडौं । नेपाली कांग्रेसको बैठकले छ बुँदे निर्णय गरेको छ । निर्वाचन आयोगले आधिकारिकता दिएपछि बसेको पहिलो बैठकले पार्टी एकता, आगामी निर्वाचन र पूर्वसभापति शेरबहादुर देउवाको भूमिकालगायतबारे निर्णयहरू गरेको हो ।

प्रवक्ता देवराज चालिसेले सार्वजनिक गरेका निर्णयहरूमा निर्वाचन आयोगको निर्णयलाई पनि स्वागत गर्ने उल्लेख छ ।

देउवाले कांग्रेस पार्टीको लामो समय नेतृत्व गरेर योगदान पुर्‍याएको भन्दै धन्यवाद गर्ने गरेको छ । अब उनको भूमिका कांग्रेसमा अभिभावकीय हुनुपर्ने भनिएको छ ।

निर्वाचनमा कहिल्यै अप्राकृतिक गठबन्धन वा सत्ताकेन्द्रित सम्झौता नगर्ने घोषणा गरिएको छ ।

संविधानको रक्षा र नवयुवाको आकांक्षालाई सम्बोधन गर्ने पनि निर्णय भएको छ ।

हेर्नुहोस् बैठकका निर्णयहरू

१.

निर्वाचन आयोगले नेपाली कांग्रेसको दोस्रो विशेष महाधिवेशनका निर्णयहरूलाई संविधान, कानुन र पार्टी विधानअनुसार मान्यता दिई अद्यावधिक गरिसकेको छ । यो कसैको जित/हार होइन— यो विधान र लोकतन्त्रको विजय हो । यस ऐतिहासिक परिवर्तनमा साथ दिने हरेक सदस्य, शुभेच्छुक र सहयोगीप्रति हृदयदेखि केन्द्रिय समितिको यो वैठक हार्दिक आभार व्यक्त गर्दछ ।

२.

यो समय एकता, सद्‍भाव र सहकार्यको समय हो । देश/विदेशमा रहेका सबै काग्रेसजन, सबै तहका समितिहरू र सबै भातृ तथा शभेच्छुक सस्थाका साथिहरूलाई नवीन ऊर्जा, अटुट विश्‍वास र पूर्ण एकताका साथ फागुन २१ को निर्वाचनमा सशक्त रूपमा सहभागी हुन हार्दिक आह्वान गरिन्छ ।

३.

विभिन्‍न कारणले पार्टीवाट निष्कृय रहनु भएका, विभिन्‍न कारणले पार्टी छाड्नुभएका सबै साथीहरूलाई पार्टीमा पुन: जोडिन यो बैठक हार्दिकतापूर्वक आव्हान गर्दछ ।

४.

यतिबेला हामी निवर्तमान सभापति शेरबहादुर देउवालगायत नेताहरूले नेपाली कांग्रेसको नेतृत्त्वमा रही लामो समयदेखि पुर्‍याउनुभएको योगदानको उच्च कदर गर्दै हार्दिक धन्यवाद प्रकट गर्दछ । यो बैठकले श्रद्देय नेताको अभिभावकीय भूमिका प्राप्त हुने विश्‍वास राख्दछ ।

५.

नेपाली कांग्रेस आम नेपाली नागरिकप्रति आफ्नो अटल प्रतिबद्धता पुन: दोहाेर्‍याउन चाहन्छ -अब कुनै अप्राकृतिक गठबन्धन वा सत्ताकेन्द्रित सम्झौता हुने छैन । हामी सदैव मूल्य र सिद्धान्तमा अडिग रहनेछौँ । संविधानको रक्षा गर्दै समृद्ध नेपालको नेतृत्त्व गर्ने छौ । नवयुवाको आकांक्षा र जनताको अपेक्षालाई साकार पार्ने छौँ ।

६.

यो नयाँ अध्याय हो— रुपान्तरणको, एकताको, विजयको ।

सबैमा अनुरोध छ, समुन्‍नत नेपाल निर्माणको महाअभियानमा जोडिनुहोस्। थप स्‍नेह, विश्‍वास र साथ दिन सबैमा अनुरोध छ ।

जय नेपाल

देवराज चालिसे
प्रवक्ता
नेपाली कांग्रेस