काठमाडौं । शनिबार बसेको नेकपा एमालेको बैठकले अध्यक्ष केपी शर्मा ओलीलाई प्रधानमन्त्रीका रुपमा अघि सार्ने निर्णय गरेको छ । अध्यक्ष ओली यसअघि २०७२, २०७४ र २०७८ सालमा प्रधानमन्त्री बनेका थिए ।

एमाले सचिवालयको बैठकले ओली झापा-५बाट उम्मेदवार बन्‍ने निर्णय पनि गरेको छ । योसँगै ओली सातौंपटक संसदीय निर्वाचनको मैदानमा होमिन लागेका हुन् ।

बहुदल आएपछि भएको पहिलो निर्वाचन २०४८ मा झापा-६ बाट विजयी भएका ओली यहीँबाट २०५१ मा पनि दोहोरिएका थिए । यस्तै, २०५६ सालको आम निर्वाचनमा झापा-२ मा विजयी भएका थिए ।

२०६४ सालको पहिलो संविधानसभा निर्वाचनमा माओवादी उम्मेदवार विश्‍वदीप लिङदेनसँग झापा-५ मा पराजय भोगे पनि २०७०को दोस्रो संविधानसभा निर्वाचनमा जित मात्रै हासिल गरेनन्, संविधान जारी गराउन महत्वपूर्ण भूमिका पनि निर्वाह गरे ।

२०७२ मा संविधान जारी भएपछि नयाँ संविधानअनुसार भएको २०७४ साल र २०७९ सालमा भएको निर्वाचनमा पनि उनले झापा-५मा भारी अन्तरले जित हात पारेका थिए ।

यी दुवै निर्वाचनमा उनले ५० हजारभन्दा बढी मत प्राप्त गरेका थिए भने उनका निकटतम प्रतिस्पर्धीले उनले भन्दा आधा कम मत पाएका थिए ।

यसपालि झापा ५ मा नेपाली कम्युनिष्ट पार्टीले अखिल क्रान्तिकारीका पूर्वअध्यक्ष रन्जित तामाङलाई टिकट दिएको छ भने राष्ट्रिय स्वतन्त्र पार्टीबाट काठमाडौं महानगरपालिकाका मेयर बालेन्द्र शाह उठ्ने चर्चा छ । श्रम संस्कृति पार्टीले समीर तामाङलाई उम्मेदवार बनाएकाे छ ।

नेपाली कांग्रेसले भने उम्मेद‍वार तय गरिसकेको छैन । तर, यसपटक विश्‍वदीप लिङदेनलाई उठाउने गाइँगुइँ चर्चा छ ।