जनकपुरधाम । राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह ‘बालेन’ ले आफू भाषणभन्दा काममा विश्वास गर्ने नेता भएको दाबी गर्दै जनकपुरधामबाट प्रधानमन्त्री बन्ने आकांक्षा सार्वजनिक गरेका छन् । सोमबार जनकपुरधाममा आयोजित रास्वपाको चुनावी सभालाई सम्बोधन गर्दै उनले काठमाडौं महानगरपालिकाको मेयरका रूपमा गरेको कामलाई आधार बनाउँदै अब देशकै नेतृत्व सम्हाल्ने दाबी गरे ।

सभालाई सम्बोधन गर्दै बालेनले भने, ‘म भाषण गर्ने मान्छे होइन, काम गर्ने मान्छे हुँ । काम गरेको हेर्न चाहनुहुन्छ भने मेरो विगत हेर्नुस् ।’ काठमाडौं महानगरपालिकाको प्रमुखमा निर्वाचित भएपछि आफूले काम गरेर देखाएको जिकिर गर्दै उनले काठमाडौंबासीले आफ्नो कार्यशैली नजिकबाट देखिसकेको बताए । ‘अब यहाँका जनताले पनि मेरो काम हेर्न चाहनु हुन्छ ?’ भन्दै उनले मधेसका जनतासँग समर्थन मागे ।

यस पटकको सभामा बालेन पहिलो पटक चुनावी मञ्चबाट बोलेका थिए । उनले मैथिली भाषामै सम्बोधन गर्दै भावनात्मक अपिल गरे । ‘मधेसी छौरा प्रधानमन्त्री बन्ने वाला है’, भन्दै उनले रास्वपालाई मत दिन आग्रह गरे। रास्वपाले उनलाई प्रधानमन्त्रीको रूपमा अघि सारेको उल्लेख गर्दै उनले देशलाई नयाँ ढंगले हाँक्ने अवसर दिन मतदातासँग अनुरोध गरे ।

तर बालेनको सम्बोधन केवल उपलब्धिको चर्चा मात्रमा सीमित रहेन । उनले काठमाडौंको मेयरका रूपमा चार वर्ष काम गर्दा पनि धेरै जनसमस्यामा आफू असहाय बनेको स्वीकारोक्ति दिए । माइतीघर मण्डलामा उखु किसान, मिटरब्याज पीडितलगायतका आन्दोलन हुँदा समेत स्थानीय सरकारको सीमित अधिकारका कारण आफू मुकदर्शक भएर बस्नुपरेको उनको भनाइ थियो । ‘चार वर्ष मेयर हुँदा पनि धेरै पीडामा केही गर्न सकिनँ’, भन्दै उनले आफ्नो अनुभव सुनाए ।

यद्यपि, सीमित अधिकारबीच पनि केही काम गर्न सकेको उदाहरण उनले प्रस्तुत गरे । काठमाडौंको मेयर भएर देशभरका ३५ पालिकामा एम्बुलेन्स पुर्याउन भूमिका खेलेको स्मरण गर्दै उनले संघीय सरकारको नेतृत्व पाए कति धेरै गर्न सकिन्छ भन्ने प्रश्न उठाए । ‘स्थानीय तहमा रहेर यति गर्न सकेँ भने प्रधानमन्त्री भएर कति गर्न सकिएला ?’ भन्दै उनले आफ्नो आकांक्षा प्रस्ट पारे ।

जनकपुरको सभामा बालेनको प्रस्तुति आत्मविश्वास, आत्मालोचना र भविष्यको दाबीको मिश्रण देखिन्थ्यो । भाषणभन्दा कामलाई प्राथमिकता दिने उनको शैलीले समर्थकहरू उत्साहित देखिए भने उनले गरेको आत्मस्वीकृतिले राजनीतिक बहसलाई थप गहिरो बनाएको छ ।