काठमाडौं । राष्ट्र, राष्ट्रियता, धर्म, संस्कृति बचाउ महाअभियानका संयोजक दुर्गा प्रसाईं पक्राउ परेका छन् । उनी आज भक्तपुरस्थित आफ्नै निवासबाट पक्राउ परेका हुन् ।

प्रहरीका अनुसार पक्राउ परेका उनलाइ प्रहरी परिसर काठमाडौं लगिएको छ। फागुन ७ लाई लक्षित गरी सडक आन्दोलन गर्न सक्ने आशंकामा सरकारले उनलाई पक्राउ गरेको जनाइएको छ ।

यसअघि पनि उनी माघ २३ गते पक्राउ परेका थिए । त्यसपछि उनी माघ २५ गते हाजिरी जमानीमा रिहा भएका थिए । राप्रपाले दुर्गा प्रसाईलाई पक्राउ गरेर सरकारले तानाशाही चरित्र देखाएको आरोप लगाएको छ ।

प्रसाई पक्राउ परेपछि प्रमुख स्वकीय सचिव सुशील बरालले विज्ञप्ति जारी गर्दै पक्राउ गरेको घटनाप्रति आपत्ति जनाएका छन् ।

बरालले सुतिरहेको अवस्थामा प्रहरीले धरपकड गरी पक्राउ गरेको भन्दै व्यक्तिगत स्वतन्त्रता र मानव अधिकारको ठाडो उल्लंघन हुने गरी गरिएको यो गिरफ्तारी पूर्णतः प्रतिशोधपूर्ण र अलोकतान्त्रिक भएको विज्ञप्तिमा बताएका छन् ।