काठमाडौं । आगामी फागुन २१ गते हुने प्रतिनिधिसभा निर्वाचन नजिकिँदै गर्दा काठमाडौं–१ मा चुनावी माहोल तातेको छ। यस क्षेत्रबाट रञ्जु दर्शना राष्ट्रिय स्वतन्त्र पार्टी (रास्वपा) को उम्मेदवारका रूपमा मैदानमा उत्रिएपछि निर्वाचन थप रोचक बनेको छ।

काठमाडौं महानगरपालिकाको मेयर पदमा २०७४ सालमा उम्मेदवारी दिएर एकाएक राष्ट्रिय चर्चामा आएकी रञ्जुले त्यतिबेला २३ हजार ४३९ मत प्राप्त गर्दै आफूलाई बलियो वैकल्पिक राजनीतिक शक्तिको रूपमा स्थापित गरेकी थिइन्। युवा पुस्ताको प्रतिनिधित्व र वैकल्पिक राजनीतिप्रति जनआकर्षण बढाएको उनको त्यही अभियानले उनलाई राष्ट्रिय स्तरमा परिचित बनाएको थियो।

मेयर चुनावपछि विवेकशील र साझा पार्टीबीचको एकता–टुटफुटको शृङ्खलापछि केही समय स्वतन्त्र राजनीतिक यात्रामा रहेकी रञ्जु अहिले रास्वपाको निलो झण्डामुनि प्रतिनिधिसभा निर्वाचनमा होमिएकी छन्। हालै पहिलो सन्तानलाई जन्म दिएकी उनी पारिवारिक जिम्मेवारीसँगै सक्रिय राजनीतिक भूमिकामा फर्किएकी हुन्।

काठमाडौं–१ परम्परागत रूपमा नेपाली कांग्रेसको प्रभाव क्षेत्र मानिँदै आएको छ। यस्तो क्षेत्रमा रञ्जुको उम्मेदवारीले पुराना दल र नयाँ शक्तिबीचको प्रतिस्पर्धालाई थप चासोको विषय बनाएको छ। युवा, महिला र परिवर्तनको एजेण्डा उठाउँदै आएकी रञ्जुलाई यसपटकको निर्वाचन उनको संसदीय यात्राको पहिलो खुड्किलोका रूपमा हेरिएको छ।

चुनावी मैदानमा पुराना राजनीतिक विरासत र नयाँ पुस्ताको आकांक्षाबीचको प्रतिस्पर्धा कसरी परिणाममा रूपान्तरण हुन्छ भन्ने विषयमा मतदाताहरूको चासो केन्द्रित रहेको छ। काठमाडौं–१ को नतिजाले राष्ट्रिय राजनीतिक समीकरणमा समेत सन्देश दिने विश्लेषकहरूको बुझाइ छ।