काठमाडौं । नेकपा एमालेका अध्यक्ष केपी शर्मा ओलीले देशको अखण्डता, स्वाभिमान र राष्ट्रियताको प्रश्नमा अब स्पष्ट निर्णय गर्ने बेला आएको बताएका छन्। उनले नागरिकहरूलाई भावनामा होइन, ‘ठण्डा दिमागल देशको भविष्यबारे निर्णय गर्न आह्वान गरेका छन्।

ओलीले देश बचाउने कि नबचाउने भन्ने प्रश्न अब टार्न नसकिने अवस्थामा पुगेको उल्लेख गरे।

‘आज तपाईंले ठण्डा दिमाकले एउटा प्रश्नको जवाफ दिनुपर्नेछ-यो देश हामीले बचाउने कि नबचाउने ? यो सोध्न मिल्ने प्रश्न होइन, तर सोध्नैपर्ने भएको छ,’ उनले भने।

उनले अब निर्माण र ध्वंसबीचको बाटो रोज्नुपर्ने समय आएको बताए। ‘आज तपाईंले एउटा बाटो रोज्नुपर्नेछ- बनाउने कि भत्काउने? निर्माण कि ध्वंसको?’ ओलीले प्रश्न गरे।

आफ्नो विरुद्ध भ्रम फैलाइएको दाबी गर्दै उनले आफूमा कमजोरी हुनसक्ने स्वीकार गरे पनि राष्ट्रियताको सवालमा कहिल्यै सम्झौता नगरेको स्पष्ट पारे। ‘तपाईंका मप्रति गुनासा छन्, प्रश्न पनि छन्, मेरा कमी–कमजोरी पनि होलान्। तर यस देशको अखण्डता, स्वाभिमान र राष्ट्रियताको सवालमा मैले कसैसँग कहिल्यै सम्झौता गरेको छैन र गर्दिनँ पनि,’ उनले भने।

ओलीले अब स्पष्ट कित्ताकाट गर्ने समय आएको उल्लेख गर्दै नागरिकलाई आफ्नो धार प्रष्ट पार्न आग्रह गरे। ‘तपाईं राष्ट्र जोगिनुपर्छ भन्ने पक्षमा कि राष्ट्रको भविष्य जे भए होस् भन्ने पक्षमा? यतिबेला तपाईं कुन कित्तामा हो प्रष्ट पार्नुभएन र त्यसका लागि बोल्नुभएन भने इतिहासले होइन, तपाईं आफैंले आफैंलाई कहिल्यै माफ गर्नु हुने छैन,’ उनले चेतावनी दिए।