काठमाडौं । मिर्गाैला फेल भएपछि स्याङ्जाको बिरुवा गाउँपालिका-८ का वडाध्यक्ष नवीनकुमार आलेको निधन भएको छ । उपचारकाे क्रममा पोखरास्थित आस्था अस्पतालमा आज उनकाे निधन भएकाे हाे ।

चार दिनअघि मात्रै उनी बिरामी परेका थिए । गाउँपालिका अध्यक्ष सूर्यबहादुर कुँवरका अनुसार बिरामी भएपछि उनलाई उपचारका लागि अस्पताल लगिएकाे थियाे । अस्पतालले उनकाे  मिर्गौला फेल भएकाे जानकारी दिएकाे थियाे ।

उनी २०७९ सालको स्थानीय तह निर्वाचनमा बिरुवा-८ बाट वडाध्यक्षमा नेकपा एमालेबाट निर्वाचित भएका थिए । उनी एमाले बिरुवा गाउँपालिका कमिटीका पूर्वउपसचिव समेत हुन् । उनकाे निधनले गाउँपालिका तथा स्थानीय समुदायमा शोक छाएको छ ।