काठमाडौं । कांग्रेसका निवर्तमान सभापति शेरबहादुर देउवाले ‘जेन–जी’ विद्रोहलाई नितान्त षड्यन्त्र भएको बताएका छन् ।

उनले गौरीबहादुर कार्की नेतृत्वको जाँचबुझ आयोगसमक्ष यस्तो बयान दिएका हुन् । उनले आफ्नो घटना षड्यन्त्रपूूर्वक भएको तर कसले गरेको भन्ने थाहा नभएको पनि बताए ।

मिडियाबाट सार्वजनिक जेन–जी प्रतिवेदनमा भनिएको छ, ‘प्रहरी कार्यालयमा रिपोर्ट गरेको थिएन । यो नितान्त षड्यन्त्र हो, तर कसले गर्‍यो ? थाहा भएन । तर मेरो निवासमा भएको तोडफोड, आगजनी र लुटपाट सम्बन्धमा नेपाल प्रहरीले मुचुल्कालगायतका विवरण लगेको हो, र कारबाही सम्बन्धमा जानकारी छैन । मैले राजनीतिक हस्तक्षेप, पक्षपात गरेको छैन र २३–२४ गतेको घटनामा प्रहरीले आंकलन गर्न नसकेकोमा राजनीतिक हस्तक्षेप भएको भन्नेमा म सहमत छैन ।’

उनले विद्रोहको बेला घरमा के–के भयो भन्ने खुलाएका छैनन् ।

‘२०८२ भाद्र २३ गतेको दिन म बूढानीलकण्ठ वडा नं २ बासुकी मार्गस्थित मेरो निजीनिवासमा थिएँ, र सो दिन बेलुका वालुबाटारमा पनि उपस्थित भई मैले सामाजिक सञ्जालमाथिको प्रतिबन्ध हटाउन आग्रह गरेर तत्कालीन प्रधानमन्त्रीले हटाउनुभएको थियो तर म कुनै औपचारिक बैठकमा सहभागी थिइनँ । भदौ २४ गते बिहान १० बजे प्रदर्शनकारीहरू मेरो निजीनिवासमा भेला भई नाराबाजी गर्दा सुरक्षाकर्मीले रोक्दारोक्दै हामीमाथि हातपात भयो, र केही जेन–जीका युवाहरूले बचाए । हामी राति २२ बजेतिर सुरक्षित स्थान पुुग्यौँ ।’

उनले आफ्नो घरमा धेरै पैसा नभएको दाबी पनि गरेका छन् ।

‘नेपाल प्रहरीले वडा अध्यक्षको रोहबरमा गरेको मुचुल्कामा मेरो निवासमा भेटिएको रकमबारे उल्लेख छ, ठूलो परिमाण थिएन । सामाजिक सञ्जालको विवरण एआई जेनेरेटेड हुनुपर्छ ।’