काठमाडौं । मुस्ताङ एयरको कलसाइन नाइन-एन-एएनओ रहेको एक हेलिकप्टर आज दोलखा क्षेत्रबाट सम्पर्कविहीन भएको छ। उक्त हेलिकप्टर बिहान काठमाडौंबाट दोलखातर्फ उडेको थियो।

क्याप्टेन सुरज थापासहित पाँच जना हेलिकप्टरमा रहेको र उनीहरू मध्याह्न १२:४५ बजेदेखि सम्पर्कविहीन भएको नागरिक उड्डयन प्राधिकरणका सूचना अधिकारी ज्ञानेन्द्र भुलले पुष्टि गरे।

दोलखाका डीएसपी मनोज लामाका अनुसार हेलिकप्टर बिगु गाउँपालिका-१ लुम्नाङबाट उडेको र त्यसपछि लाप्त्चेतर्फ गएको देखिन्छ।

‘लाप्त्चेमा अवतरण भयो कि भएन भन्ने विषयमा बुझ्दैछौं। प्रहरी कार्यालय रहेको स्थानबाट त्यहाँ पुग्न ६-७ घण्टा लाग्छ, अहिले मौसम पनि खराब छ,’ डीएसपी लामाले बताए।

सम्पर्कविहीन हेलिकप्टरको खोजी कार्य मौसमका कारण प्रभावित भइरहेको जनाइएको छ।