काठमाडौं । शुक्रबार मध्याह्नपछि दोलखाको लाप्चा क्षेत्रमा मुस्ताङ एयरको हेलिकप्टर सम्पर्कविहीन भएको नेपाल नागरिक उड्डयन प्राधिकरणले जनाएको छ। क्याप्टेन सुरज थापाको कमान्डमा रहेको यो हेलिकप्टर लाङटाङको दक्षिण-पूर्वमा पर्ने लाप्चा क्षेत्रमा पुगेपछि सम्पर्क टुटेको बताइएको छ।

‘९-एन-एएनओ’ दर्ता नम्बरको उक्त हेलिकप्टरमा चार यात्रु सवार रहेको प्राधिकरणका एक अधिकारीले जानकारी दिए। तर मुस्ताङ एयरका प्रबन्ध निर्देशक रोनान लामिछानेका अनुसार पाइलटसहित पाँच जना हेलिकप्टरमा थिए।

त्रिभुवन विमानस्थलका एक अधिकारीका अनुसार लगातारको खराब मौसमका कारण हेलिकप्टरले लाप्चा क्षेत्रकै कुनै स्थानमा आकस्मिक अवतरण गरेको हुनसक्ने प्रारम्भिक अनुमान छ, तर यो जानकारी पुष्टि हुन बाँकी छ।

दोलखाका प्रहरी प्रमुख प्रहरी नायब उपरीक्षक मनोजकुमार लामाले हालसम्म हेलिकप्टरको ठेगाना खुलेको नसकेको बताए। उनका अनुसार घटनास्थल वरपरको क्षेत्रमा भइरहेको अविरल वर्षाले खोज तथा उद्धार टोलीलाई हेलिकप्टरको लोकेशन पत्ता लगाउन कठिनाइ भएको छ।