काठमाडौं । प्रमुख विपक्षी नेपाली कांग्रेसले संसदीय दल गठन गर्न विलम्ब गरेको छ । पार्टीमा दुई लाइन (थापा–खड्का) सङ्घर्ष चर्किँदै जाँदा संसदीय दल गठनमा ढिलाइ गर्नुलाई अर्थपूर्ण रूपमा हेरिएको छ ।

दलको नेता हुन संसदीय राजनीतिमा अनुभवीदेखि नयाँ सांसदसम्मले आकाङ्क्षा प्रकट गरेका छन् । तर, सभापति गगन थापाको ‘इन्ट्रेस्ट’अनुसार दलको नेता चयन हुने निश्चितै छ ।

यसपाली पाँचथरदेखि प्रतिनिधिसभा निर्वाचनमा प्रत्यक्षतर्फबाट निर्वाचित सांसद नरेन्द्रकुमार केरुङ दलको नेता बन्ने चर्चा तीब्र छ । उनी प्राज्ञिक क्षेत्रबाट राजनीतिमा आएका सांसद हुन् ।

प्रभावशाली छवि भएका केरुङ प्रतिनिधिसभामा जनता र देशलाई केन्द्रविन्दुमा राखेर घनघोर आवाज उठाउन सक्ने सांसद हुन् । विपक्षी नेताको पदीय मर्यादा र जिम्मेवारीलाई न्याय गर्न सक्ने नेताको रूपमा पनि उनलाई हेरिन्छ ।

सांसद केरुरूलाई हालै नेपालवान एचडीको भिडियो वार्तामा सोधिएको थियो, ‘दलको नेता हुन तपाईंले ‘लबिइङ’ गर्दै हुनुहुन्छ ?

जवाफमा उनले ‘आज्ञाकारी कार्यकर्ता’ आफू भएको र पार्टीले जे निर्णय गर्छ, त्यो भूमिका निर्वाह गर्न तयार रहेको तर नेताहरूको घरघर धाएको छैन ।’

नेता केरुङको यो अभिव्यक्तिले उनी संसदीय दलको हुन मरिहत्ते गरिरहेका छैनन्। अर्थात् नेताहरूसँग ‘लबिइङ’मा उनी छैनन् । तर, जिम्मेवारी पाए ‘उत्कृष्ट परफर्मेन्स’ को लागि तयार रहेको बताएका छन् ।

केरुङसँगै संसदीय दलको नेतामा निवर्तमान सहमहामन्त्री भीष्मराज आङ्देम्बे पनि बलिया दाबेदार हुन् । उनले प्रतिनिधिसभामा पद तथा गोपनीयताको शपथ ग्रहण गरेकै दिन आफू दलको नेतामा ‘हकदार’ रहेको बताएका थिए । त्यसका लागि नेताहरूसँग गम्भीर रूपमा छलफल गर्ने बताए ।

उनका अनुसार पार्टीभित्रको संकट निवारण गर्न सहजीकरण गर्न पनि आफू संसदीय दलको नेता हुनुपर्ने आवश्यकता छ । आङ्देम्बेको पनि घर पाँचथरै हो ।

बिहीबार प्रतिनिधिसभा बैठकमा उनको निकै प्रभावशाली सम्बोधन सुनिएको थियो । सन्तुलित, वस्तुनिष्ठ र आलोचनात्मक कोणबाट आएको उनको सम्बोधनले कांग्रेसभित्र प्रभावशाली नेता छायाँमा परेको भनेर टिप्पणी भइरहेको छ । उनी दोस्रोपटक संसदमा छन् ।

उनै सांसदहरू आङ्देम्बे र केरुङसँगै कांग्रेसका ज्येष्ठ प्रतिनिधिसभा सदस्य अर्जुननरसिंह केसी, मोहन आचार्यलगायत नेताहरू पनि दाबेदार छन् । केसी प्रतिनिधिसभाका २७४ जना सांसदलाई शपथ ग्रहण गराउने नेता हुन् ।

उनकै अध्यक्षतामा प्रतिनिधिसभाको पहिलो बैठकसमेत बस्यो । २०३८ सालदेखि संसदीय राजनीतिमा रहेका केसी पार्टी सभापति गगन थापाका ससुरा हुन् । केसी समानुपातिकतर्फबाट सांसदको सूचीमा रहँदा व्यापाक आलोचना भएको थियो ।

थापा स्वयंले आफूले सूचीमा नराखेको भनेर प्रष्टीकरण दिनुपरेको थियो । ‘नातावाद’विरोधी राजनीतिक परिदृश्यबीच अब थापाले आफ्ना ससुरा केसीलाई दलको नेता नबनाउने विवरणहरू आइरहेका छन् । तर, पार्टीकै केही नेताहरू भने केसीलाई नै दलको नेता बनाउन विलम्ब गरेको टिप्प्णी गरेका छन् ।

यस्तै, रसुवाबाट निर्वाचित सांसद मोहन आचार्य पनि आकाङ्क्षी देखिएका छन् । तर, स्रोतको दाबीमा कांग्रेस नेता आङ्देम्बे र केरुङ दलको नेता बन्ने प्रबल सम्भावना छ ।