कैलाली। बैतडीबाट प्रदेश सभा सदस्यमा निर्वाचित नेपाली कांग्रेसका सांसद शिवराज भट्ट सुदूरपश्चिम प्रदेशको उद्योग, पर्यटन, वन तथा वातावरण मन्त्रीमा नियुक्त भएका छन्।

मुख्यमन्त्री कमलबहादुर शाहले भट्टलाई मन्त्रीमा नियुक्त गरी सो सम्बन्धमा प्रदेश प्रमुखको कार्यालयलाई जानकारी गराइसकेका छन्। उक्त मन्त्रालय असारदेखि रिक्त रहेकाले मुख्यमन्त्री शाहले नै त्यसको जिम्मेवारी सम्हाल्दै आएका थिए। नवनियुक्त मन्त्री भट्टले आज साँझ ५ बजे सपथ ग्रहण गर्ने कार्यक्रम रहेको छ।

बैतडी प्रदेशसभा क्षेत्र नं. २ बाट निर्वाचित भट्ट यसअघि कानुन मन्त्रीको जिम्मेवारीमा रहेका थिए। संसदीय दलको बैठकले उनलाई मन्त्री बनाउने निर्णय गरेको हो।

यसैगरी बैठकले फागुन २१ गते सम्पन्न प्रतिनिधि सभा निर्वाचनपछि गठन भएको संघीय सरकारलाई बधाई ज्ञापन गर्दै प्रधानमन्त्री वालेन्द्र शाहको नेतृत्वमा गठित मन्त्रिपरिषद्लाई सफल कार्यकालको शुभकामना दिने निर्णय गरेको छ।

त्यसैगरी बैठकले आर्थिक वर्ष २०८३/०८४ को बजेट निर्माणका लागि आवश्यक सल्लाह–सुझाव दिन तीन सदस्यीय बजेट सुझाव समिति गठन गरेको छ। संसदीय दलका प्रमुख सचेतक विक्रम सिंह धामीको संयोजकत्वमा गठित उक्त समितिमा गीता कुमारी चौधरी र पदमबहादुर शाही सदस्य रहेका छन्।