काठमाडौं । बालेन्द्र शाह (बालेन) प्रधानमन्त्री भएको दुई साताअघि नै उनीप्रति यौनजन्य हिंसा गर्नुपर्ने भन्दै गरेको अश्लील टिप्पणीयुक्त भिडियोलाई लिएर पाँचथरको फाल्गुनन्द गाउँपालिका–७ का रोशन पोखरेल पक्राउ परेका छन् ।

अंग्रेजी र नेपाली आधा आधा मिसाएर बोलेका उनले प्रधानन्त्री बालेनप्रति सामूहिक रुपमा त्यस्तो हिंसा गर्नुपर्ने टिप्पणी गरेका थिए । बालेनलाई भन्दा अघि नेपाली कांग्रेसका निवर्तमान सभापति शेरबहादुर देउवा दम्पतीलाई बूढानीलकण्ठस्थित निवासमा लोत कुटपिट गरेको र हेर्ने आफूलाई समेत मजा आएको भनेका थिए ।

सबै नेतालाई पक्राउ गर्नुपर्ने, कुट्नुपर्ने र उपचार गर्दै फेरि कुट्नुपर्ने जस्ता हिंसात्मक अभिव्यक्ति पनि दिएका थिए ।

सोही भिडियोको अन्तिममा भने बालेनप्रति हिंसात्मक टिप्पणी गरेका थिए । रास्वपा सभापति रवि लामिछानेलाई अपमान गर्दै अर्कै नाम दिएका थिए ।

जेन–जी विद्रोहलगत्तै हाल सांसद भएका तत्कालीन धरानका मेयर हर्क साम्पाङको हर्कत देखिएको, काठमाडौंका तत्कालीन मेयर बालेनको घुक्याइँ देखेको र हामी नेपालका तत्कालीन अध्यक्ष सुधन गुरुङ रोएको देखिएको पनि बताएका थिए ।

उनले भिडियोमा नयाँ पुराना सबै दलका नेताहरूप्रति कडा टिप्पणी गरेका थिए । तर, प्रधानमन्त्री बालेनप्रतिको टिप्पणीलाई आधार मानेर उनी पक्राउ परेका हुन् ।

हाल राष्ट्रिय स्वतन्त्र पार्टी (रास्वपा)मा संगठित भएका धेरै कार्यकर्ताले एमाले अध्यक्ष केपी शर्मा ओली, कांग्रेसका निवर्तमान सभापति शेरबहादुर देउवा, नेकपा संयोजक पुष्पकमल दाहाललगायत नेताहरूप्रति हिंसात्मक अभिव्यक्ति दिन्थे ।

तर, पनि त्यसरी बोल्न पाउनु अभिव्यक्ति स्वतन्त्रतासँग जोड्थे । आलोचना गरेकाहरूलाई पक्रिँदैनथ्यो । जब बालेन प्रधानमन्त्री बने, आलोचकहरूलाई पक्राउ गर्दै थुन्नेतिर उन्मुख भएको भन्दै आलोचना भइरहेको छ ।

पक्राउ परेका रोशनको रिहाइ माग गर्दै सामाजिक सञ्जालहरूको बालेन सरकार निरंकुश बन्न खोजेको भन्दै मानिसहरुले आक्रोश पोखिरहेका छन् ।