काठमाडाैं। संस्कृति, पर्यटन तथा नागरिक उड्डयनमन्त्री खडकराज पौडेलले नेपाल ध्यानको उद्गम बिन्दु भएको बताएका छन् ।

अन्तर्राष्ट्रिय आरोग्य दिवसका अवसरमा काठमाडौंमा अयाोजित कार्यक्रमलाई सम्बोधन गर्दै उनले यस्तो बताउनुभएका हुन् । पशुपतिनाथ, लुम्बिनी, जनकपुर धामदेखि मुक्तिनाथसम्म फैलिएको आध्यात्मिक सम्पदा, बहुधार्मिक, बहुसांस्कृतिक परम्परा, भौगोलिक विविधता र प्राकृतिक सौन्दर्य नै जीवित सभ्यताका सशक्त सेतुहरू भएको मन्त्री पौडेलले बताए ।

मन्त्री पौडेलले नेपाललाई विश्व आरोग्य पर्यटनको केन्द्र बनाउने सरकारको नीतिगत प्राथमिकता रहेको जानकारी दिए । उनका अनुसार सरकारले सन् २०२७ लाई ‘नेपाल वेलनेस ईयर’ (आरोग्य वर्ष) को रुपमा मनाउने घोषणा गरेको र यसलाई आर्थिक रुपान्तरणको एजेण्डाको रुपमा अघि बढाइने छ। उनले आरोग्यलाई जीवनशैली र संस्कारकै रुपमा विकास गरिने लक्ष्य राखिएको दाबी गरे। आरोग्य पर्यटनलाई सफल बनाउन निजी क्षेत्र, शैक्षिक संस्था, संचार क्षेत्र र विश्व समुदायलाई सामूहिक प्रयासका लागि उनले अपिल गरे ।

उनले भने, ‘नेपाल ध्यानको उद्गम बिन्दु हो जहाँ हजारौं वर्ष अघि ऋषिमुनिहरूले मानव चेतनाको गहिरो विज्ञान पत्ता लगाएका थिए । हाम्रो प्रकृति नै आरोग्यको केन्द्र हो । यो शान्ति, अध्यात्म र आरोग्यको मधुर धुन बजाइरहेको पवित्र भूमि हो । त्यसैले नेपालमा घुम्न मात्र होइन, आफूलाई चिन्न आउनुस् ।’

नेपाल सरकारको एकल प्रस्तावमा संयुक्त राष्ट्र संघको महासभाबाट पारित भएअनुसार आज अप्रिल १५ लाई विश्वभर अन्तर्राष्ट्रिय आरोग्य दिवसको रुपमा मनाइँदैछ । यो अवसर नेपालका लागि कुटनीतिक र सांस्कृतिक दृष्टिले ऐतिहासिक उपलब्धि भएको बताए।