काठमाडौं। आगामी सोमबार र मंगलबार काठमाडौँस्थित त्रिभुवन विश्वविद्यालय क्रिकेट मैदानमा हुने युएईसँगको टी-२० अन्तर्राष्ट्रिय शृंखलाका लागि नेपाली टोली घोषणा गरिएको छ।

नेपाल क्रिकेट संघ (क्यान)ले दीपेन्द्रसिंह ऐरीको कप्तानीमा १५ सदस्यीय टोली सार्वजनिक गरेको हो।

यस पटकको टोलीमा रोहित पौडेल समावेश छैनन्। यस्तै कुशल मल्ल र अर्जुन साउद पुनः टोलीमा फर्किएका छन्।

क्यानका अनुसार कुशल मल्लले टी-२० विश्वकप एसिया छनोटपछि पहिलो पटक टोलीमा पुनरागमन गरेका हुन् भने अर्जुन साउदले सन् २०२२ पछि पुनः अवसर पाएका हुन्।

त्यस्तै सन्तोष यादव र हेमन्त धामी पनि टोलीमा परेका छन्, जसले अहिलेसम्म अन्तर्राष्ट्रिय टी-२० खेलमा डेब्यू गर्न बाँकी छ।

क्यानले टी-२० आईका लागि दीपेन्द्र ऐरीलाई कप्तान र एकदिवसीय टोलीका लागि रोहित पौडेललाई कप्तान बनाउने निर्णय गरेको जनाएको छ।