धनगढी । कैलालीमा मरेको ब्रोइलर कुखुराको मासु खाँदा बिरामी परेका दुई बालकको मृत्यु भएको छ। 

चुरे गाउँपालिका-३, भक्तपुरका ५ वर्षीय दीपक ताम्राकार र ८ वर्षीय भीम ताम्राकारको उपचारका क्रममा शुक्रबार सेती प्रादेशिक अस्पतालमा निधन भएको प्रहरीले जनाएको छ।

दुवै जना सहोदर दाजुभाइ हुन्। जिल्ला प्रहरी कार्यालयका सहायक प्रवक्ता प्रहरी निरीक्षक कैलाश विष्टका अनुसार उनीहरूले बिहीबार मरेको कुखुराको मासु खाएपछि स्वास्थ्य समस्या देखिएको थियो।

यसै घटनामा मृतककी आमा २८ वर्षीया राधिका ताम्राकार र ३ वर्षीय कान्छा छोरा दिपेश ताम्राकारको सोही अस्पतालमा उपचार भइरहेको छ।

घटना बिहीबार भएको भए पनि प्रहरीलाई शुक्रबार मात्र जानकारी दिइएको थियो। त्यसपछि प्रहरीको समन्वयमा चारै जनालाई उपचारका लागि धनगढी लगिएको थियो। प्रारम्भिक अनुसन्धानअनुसार उनीहरूले मरेको कुखुराको मासु स्थानीय विकास पोल्ट्री फार्मबाट खरिद गरेको खुलेको प्रहरीले जनाएको छ।