काठमाडौं। आइतबारदेखि सुरु हुने नवौँ संस्करणको भोजपुर गोल्डकपको सम्पूर्ण तयारी पूरा भएको छ। प्रतियोगितामा नेपालका आठ समूहको सहभागिता रहनेछ।

आयोजक जिल्ला फुटबल सङ्घका अध्यक्ष प्रवीण सुवालका अनुसार भोजपुर नगरपालिका-७ स्थित रंगशालामा हुने प्रतियोगिताका लागि खेल तालिका सार्वजनिक गरिएको छ। प्रतियोगितामा भोजपुर नगरपालिकाले ३० लाख रुपैयाँ प्रायोजन गरेको छ।

प्रतियोगिता वैशाख ६ देखि १२ गतेसम्म सञ्चालन हुनेछ। पहिलो खेल आइतबार सशस्त्र प्रहरी बल (एपीएफ) र एलएक्स सिटी मोरङबीच हुने आयोजकले जनाएको छ।

पहिलो चरणका अन्य खेलमा वैशाख ७ गते आयोजक भोजपुर जिल्ला फुटबल सङ्घ र सङ्खुवासभा-११, वैशाख ८ गते सातदोबाटो युथ क्लब र केपिलासगढी गाउँपालिका खोटाङ तथा वैशाख ९ गते प्लानिङ ब्वाइज युनाइटेड र द गोर्खाज फुटबल क्लबबीच प्रतिस्पर्धा हुनेछ।

प्रतियोगिताको विजेताले पाँच लाख र उपविजेताले तीन लाख रुपैयाँ पुरस्कार प्राप्त गर्नेछन्। उत्कृष्ट खेलाडी, सर्वाधिक गोलकर्ता र उत्कृष्ट गोलरक्षकलाई पनि पुरस्कारको व्यवस्था गरिएको छ।

यसैबीच, वैशाख १७ देखि २० गतेसम्म आठौँ महिला फुटबल प्रतियोगिता पनि सञ्चालन हुने भएको छ। उक्त प्रतियोगिता पनि जिल्ला फुटबल सङ्घको आयोजनामा र भोजपुर नगरपालिकाको प्रायोजनमा हुने बताइएको छ।