काठमाडौं। इरान मा इजरायल का लागि जासुसी गरेको आरोपमा एक जनालाई मृत्युदण्ड दिइएको छ।

इरानी न्यायपालिकाका अनुसार मेहदी फरीद नामक व्यक्तिले इजरायलको गुप्तचर एजेन्सी मोसादलाई देशका संवेदनशील विषयबारे जानकारी उपलब्ध गराएका थिए।

अदालतका अनुसार फरीद इरानको ‘प्यासिभ डिफेन्स कमिटी’ को व्यवस्थापन विभागमा कार्यरत थिए र इन्टरनेटमार्फत इजरायलसँग सम्पर्क राख्दै आएका थिए।

यता मानव अधिकारसम्बन्धी संगठन र सामाजिक कार्यकर्ताहरूले बढ्दो मृत्युदण्डका घटनाप्रति चिन्ता व्यक्त गरेका छन्। विशेषगरी अमेरिका, इजरायल र इरानबीच तनाव तथा युद्धको अवस्था बढेसँगै यस्ता घटनामा वृद्धि भएको बताइएको छ।

बीबीसी फारसी को रिपोर्टअनुसार युद्ध सुरु भएयता मृत्युदण्ड जासुसी आरोपमा सीमित नरही विरोध प्रदर्शनमा संलग्न व्यक्तिहरूमाथि पनि लागू गरिएको जनाइएको छ।