काठमाडौँ । बजारमा महँगी निरन्तर बढिरहेकै समयमा सरकारले सार्वजनिक यातायातको भाडा फेरि समायोजन गर्ने तयारी थालेको छ। पछिल्ला केही महिनामा डिजेलको मूल्य करिब ५५ रुपैयाँ प्रतिलिटरले उक्लिँदा पनि भाडा समायोजन नगरेको व्यवसायीहरूको लगातार गुनासोपछि सरकार सक्रिय बनेको हो।

यातायात व्यवस्था विभागले अन्तरप्रदेश रूटमा चल्ने बस तथा मालवाहक सवारी साधनको भाडा बढाउने प्रस्ताव तयार पारेर भौतिक पूर्वाधार तथा यातायात मन्त्रालयमा अन्तिम निर्णयका लागि पठाइसकेको छ।

विभागको नयाँ प्रस्तावअनुसार यात्रुवाहक बसको भाडा ९.८ प्रतिशत र मालढुवानी गर्ने ट्रक तथा अन्य सवारीको भाडा अधिकतम १३ प्रतिशतसम्म बढाउन सिफारिस गरिएको छ। मन्त्रालयले आवश्यक ठानेमा यस दरमा केही परिमार्जन गर्न सक्ने उल्लेख गरिएको छ।