काठमाडौं । नेकपा एमालेका सचिव महेश बस्नेतले सुकुम्बासी बस्ती हटाउने बालेन सरकारको निर्णयको विरोध जनाएका छन्।

बस्नेतले सरकारको कदमप्रति असन्तुष्टि व्यक्त गर्दै ‘गरिबविरोधी नीति’ को संज्ञा दिएका छन्।

प्रधानमन्त्री बालेन्द्र शाहले सुरक्षा प्रमुखलाई बोलाएर शनिबार-आइतबारभित्र अतिक्रमित बस्ती खाली गराउन निर्देशन दिएको विषय सार्वजनिक भएपछि बस्नेतले उक्त कदमको विरोध गरेका हुन्।

उनले आफ्नो स्टाटसमा लेखेका छन्, ‘सुकुम्बासीलाई लखेट्ने होइन, व्यवस्थित गर्ने हो। गरिबी हटाउने नाममा गरिबलाई नै समाप्त पार्ने नीति स्वीकार्य हुँदैन।’

बस्नेतले विगतमा रास्वपा सभापति रवि लामिछानेले दिएको अभिव्यक्तिलाई स्मरण गराउँदै अहिलेको निर्णयसँग तुलना गरेका छन्। उनले उल्लेख गरेका छन्, ‘उनकै दलका सभापति रवि लामिछानेले सुकुम्बासी बस्तीमा डोजर आयो भने म छाती थाप्छु’ भनेर ठूलो भाषण दिनुहुन्थ्यो। आज त्यो प्रतिबद्धता कहाँ गयो ? जनतालाई भ्रममा राख्ने भाषण मात्रै हो त ?हिजो ‘डोजर आयो भने छाती थाप्छु’ भन्नेहरू आज किन मौन छन्? जनतालाई भ्रममा राख्ने भाषण मात्रै हो त?’

बस्नेतले सरकारका अन्य नीतिहरूको पनि आलोचना गरेका छन्। उनले लेखेका छन्, ‘सडक चौडा र फुटपाथ सफा गर्ने नाममा साना व्यवसायीमाथि डोजर चलाउने, भन्सारमा कडाइ गरेर गरिबको दाल-चामल खोस्ने, यो प्रगति होइन, गरिबमाथिको हमला हो।’

उनले थपेका छन्, ‘यस्ता जनविरोधी र गरिबमारा निर्णयले सरकारको असली चरित्र उजागर भएको छ। जनता चुप लागेर बस्ने छैनन्, धैर्यको सीमा हुन्छ।’

बस्नेतको यो अभिव्यक्तिपछि सुकुम्बासी व्यवस्थापनको विषय पुनः राजनीतिक बहसको केन्द्रमा आएको छ।

एकातर्फ सरकार शहरी व्यवस्थापन र कानुनी शासन कायम गर्ने दाबी गरिरहेको छ भने अर्कोतर्फ विपक्षी दलहरूले यसलाई जनविरोधी कदम भन्दै आलोचना तीव्र बनाएका छन्।