काठमाडौं।  चीनको सान्यामा जारी छैटौँ एसियन ‘बीच गेम्स’ २०२६ अन्तर्गत महिला कबड्डीमा नेपालले उत्कृष्ट प्रदर्शन गर्दै समूह ‘बी’ को विजेता बनेको छ।

समूह चरणको अन्तिम खेलमा नेपालले बंगलादेशलाई ३८-३६ को रोमाञ्चक अन्तरले पराजित गरेको हो। यससँगै नेपाल समूह चरणका सबै खेल जित्दै अपराजित रहँदै सेमिफाइनलमा प्रवेश गरेको छ।

बंगलादेशविरुद्धको खेलमा नेपालले पहिलो हाफमा १९-१७ को अग्रता बनाएको थियो भने दोस्रो हाफमा सो अग्रता जोगाउँदै जित सुनिश्चित गरेको थियो।

यसअघि समूह चरणको पहिलो खेलमा नेपालले चाइनिज ताइपेइलाई ४८-३२ ले पराजित गरेको थियो। दोस्रो खेलमा थाइल्यान्डलाई ४९–३३ ले हराउँदै लगातार दोस्रो जित दर्ता गरेको थियो।

समूह चरणमा अपराजित रहँदै शीर्ष स्थान हासिल गरेको नेपाल अब सेमिफाइनलमा श्रीलंकासँग प्रतिस्पर्धा गर्ने नेपाल ओलम्पिक कमिटीले जनाएको छ।